দেশৰ বিভিন্ন মহানগৰত উত্তৰ-পূবৰ ছাত্ৰ-ছাত্ৰী সকল বৰ্ণবাদী আক্ৰমণৰ সন্মুখিন হোৱা ঘটনাক শনিবাৰে প্ৰধান মন্ত্ৰী নৰেন্দ্ৰ মোদীয়ে গৰিহণা দিয়াৰ লগতে এনেধৰণৰ ঘটনাৰ বিৰুদ্ধে কঠোৰ পদক্ষেপ গ্ৰহণ কৰা হ’ব বুলি কয়।
দেশত চিকিৎসক, নাৰ্চকে ধৰি স্বাস্থ্য কৰ্মী সকলৰ লগতে উত্তৰ-পূব আৰু কাশ্মীৰৰ ছাত্ৰ-ছাত্ৰী সকল বেয়া ব্যৱহাৰৰ সন্মুখিন হোৱাৰ লগতে অপদষ্ট হোৱা ঘটনাক প্ৰধান মন্ত্ৰী মোদীয়ে গৰিহণা দি ইয়াক কঠোৰ হাতেৰে নিয়ন্ত্ৰণ কৰাৰ প্ৰয়োজন বুলি কয়।
প্ৰধান মন্ত্ৰী নৰেন্দ্ৰ মোদীয়ে দেশৰ মুখ্য মন্ত্ৰী সকলৰ সৈতে কোভিদ-১৯ সন্দৰ্ভত আলোচনাত মিলিত হোৱাৰ সময়তে এই প্ৰসংগ উল্লেখ কৰে।
মুখ্য মন্ত্ৰী সকলৰ সৈতে ভিডিঅ’ কনফাৰেঞ্চিঙৰ জৰিয়তে হোৱা বৈঠকত বিভিন্ন ৰাজ্যৰ মুখ্য মন্ত্ৰী সকলে দেশত ল’কডাউনৰ সময়সীমা বৃদ্ধি কৰাৰ বাবে মোদীক অনুৰোধ কৰে।
আনহাতে, বৈঠকত মুখ্য মন্ত্ৰী সকলে প্ৰধান মন্ত্ৰীক ল’কডাউনৰ সময়ত ক’ৰ’না ভাইৰাছৰ বিৰুদ্ধে যুঁজাৰ বাবে প্ৰধান মন্ত্ৰীক ৰাজ্য সমূহলৈ সাহায্য প্ৰদানৰ বাবেও কয়।
প্ৰধান মন্ত্ৰী নৰেন্দ্ৰ মোদীয়ে এয়া তৃতীয়বাৰৰ বাবে দেশৰ বিভিন্ন ৰাজ্যৰ মুখ্য মন্ত্ৰী সকলৰ সৈতে বৈঠকত অংশ লয়।
তদুপৰি, বৈঠকত প্ৰধান মন্ত্ৰীয়ে আৰোগ্য সেতু এপক নিজ নিজ ৰাজ্যত জনপ্ৰিয় কৰাৰ বাবেও মুখ্য মন্ত্ৰীসকলক অনুৰোধ কৰে।
