ধুবুৰীৰ ১৯ গৰাকী লোকক কুৱাৰেণ্টাইন কৰা হৈছে।
আটাইকেইজন ব্যক্তিয়ে যোৱা ১২ মাৰ্চত গুৱাহাটীৰ আঠগাওঁ মছজিদত এক অনুষ্ঠানত ভাগ লৈছিল।
উক্ত অনুষ্ঠানত ভাগ লোৱা তিনিজন ব্যক্তি ইতিমধ্যে ক’ভিড-১৯ আক্ৰান্তৰূপে চিনাক্ত হৈছে। আঠগাওঁ মছজিদক কণ্টেইনমেণ্ট এলেকাৰূপে ঘোষণা কৰা হৈছে।
ধুবুৰীত কুৱাৰেণ্টাইন কৰা আটাইকেইজন ব্যক্তিয়ে তাবলিগি জামাতৰ সদস্য বুলি জানিব পৰা গৈছে।
বিলাসীপাৰা মছজিদকো ছীল কৰি এলেকাটোক কণ্টেইনমেণ্ট জ’নৰূপে ঘোষণা কৰা হৈছে।
ধুবুৰীৰ দুয়োজন ক’ভিড-১৯ পজিটিভ ৰোগীৰ লগতে কুৱাৰেণ্টাইন কৰা আন একাংশয়ো বিলাসীপাৰা মছজিদত এক সভাত ভাগ লৈছিল।
ধুবুৰীৰ অতিৰিক্ত উপায়ুক্ত পি মজুমদাৰে জনায়, “ধুবুৰীৰ নজন ব্যক্তিক ধুবুৰী অসামৰিক চিকিৎসালয়ৰ সমীপৰ ডি আৰ ডি এ অতিথিশালাত ৰখা হৈছে। বিলাসীপাৰা মহকুমাৰ অন্তৰ্গত ব্যক্তিসকলক বোৰ্কান্দা পি এফ একাডেমি আৰু চাপৰ মাদ্ৰাছা উচ্চতৰ মাধ্যমিক বিদ্যালয়ত কুৱাৰেণ্টাইন কৰা হৈছে।”
১৯ গৰাকী ব্যক্তিৰে নমুনা সংগ্ৰহ কৰা হৈছে আৰু পৰীক্ষাৰ বাবে প্ৰেৰণ কৰা হৈছে।
জিলাখনত ২৪৫৭গৰাকী ব্যক্তিক হ’ম কুৱাৰেণ্টাইনত ৰখাৰ বিপৰীতে ৫৪৪ গৰাকী ব্যক্তিক বিভিন্ন কেন্দ্ৰত কুৱাৰেণ্টাইন কৰা হৈছে।
