পঞ্জাবৰ চিকিৎসকৰ দলে কালি প্ৰায় ৮ ঘণ্টাজোৰা এক দীঘলীয়া তথা জটিল অস্ত্ৰোপচাৰৰ অন্তত ল’কডাউনৰ সময়ত পঞ্জাবৰ নিহাং গোটৰ সদ্যসৰ আক্ৰমণৰ বলি হোৱা হৰজিৎ সিং নামৰ এগৰাকী আৰক্ষী বিষয়াৰ কটা হাত জোৰা লাগবলৈ সক্ষম হয়।
চণ্ডিগড়ৰ Postgraduate Institute of Medical Education and Research (PGIMER)ত ৭.৫ ঘণ্টীয়া উক্ত অস্ত্ৰোপ্ৰচাৰ সম্পন্ন হয়। আক্ৰমণত হাত এৰ খাই যোৱা ৫০বছৰীয়া হৰজিৎ সিং এগৰাকী সহকাৰী আৰক্ষী উপ পৰিদৰ্শক।
দেওবাৰে দিনৰ ভাগত পাটিয়ালা জিলাৰ শানৌৰ নগৰৰ এখন শাক–পাচলিৰ বজাৰত কেইজনমান নিহাং গোটৰ সদস্যক কাৰ্ফিউ পাছ দেখুৱাবলৈ কওঁতে তেওঁলোকে তৰোৱালেৰে ঘপিয়াই সিঙৰ হাতখন কাটি পেলাইছিল। সিঙৰ উপৰি আন ৩জন আৰক্ষীৰ লোক উক্ত আক্ৰমণত আহত হয়।
অত্যন্ত জটিল অস্ত্ৰোপচাৰটো সুকলমে সম্পন্ন কৰাৰ বাবে ৰাজ্যখনৰ মুখ্য মন্ত্ৰী কেপ্টেইন অমৰিন্দৰ সিঙে চিকিৎসকৰ দলটোক ধন্যবাদ জনায়। PGIMER প্ৰতিষ্ঠানৰ প্লাষ্টিক চাৰ্জাৰী বিভাগৰ মূৰব্বী ৰমেশ শৰ্মাই অস্ত্ৰোপচাৰৰ মূল দায়িত্বত আছিল।
আনহাতে পজাব আৰক্ষীয়ে উক্ত আক্ৰমণত জড়িত থকা এগৰাকী মহিলাসহ ১১জন লোকক গ্ৰেপ্তাৰ কৰিছে।
