শিলচৰ পৌৰ নিগমৰ কৰ্মচাৰী সকলে পৌৰ নিগমৰ কৰ্মচাৰীৰ আত্মহত্যাৰ ঘটনাৰ বাবে অসম চৰকাৰক জগৰীয়া কৰিছে।
শিলচৰ পৌৰ নিগমৰ কৰ্মচাৰী ৰঞ্জন পাদা দেৱে ১৬ মাহে দৰ্মহা নোপোৱাৰ ফলত মানসিক হতাশাত ভূগি শুকুৰবাৰে বৰাক নদীত জাপ দি অত্মহত্যাৰ দৰে পথ বাছি লয়।
পৌৰ নিগমৰ কৰ্মচাৰী সকলে যোৱা ১২ দিন ধৰি গোটেই ৰাজ্য জুৰি ১৬ মাহে দৰ্মহা নোপোৱাৰ বিৰোধিতা কৰি প্ৰতিবাদ সাব্যস্ত কৰিছিল। আত্মহত্যাৰ পথ বাচি লোৱা এই ৫৪ বছৰীয়া দেৱ এই প্ৰতিবাদী কাৰ্যসূচীৰ অন্যতম সক্ৰিয় সদস্য আছিল।
শিলচৰ পৌৰ নিগমৰ এক গোপন সূত্ৰই জনোৱা মতে মৃত দেৱ শেহতীয়াকৈ কিছুদিন আৰ্থিক অনাটনৰ ফলত মানসিক হতাশাত ভূগিছিল যাৰ বাবে তেওঁ এই আত্মহত্যাৰ দৰে চূড়ান্ত সিদ্ধান্ত ল’বলৈ বাধ্য হয়।
এছ ডি আৰ এফে শিলচৰ পৌৰ নিগমত নগৰপালিকা নিৰীক্ষক হিচাপে কৰ্মৰত দেৱৰ মৃতদেহ শনিবাৰে দিনৰ ১ বজাত উদ্ধাৰ কৰিবলৈ সক্ষম হয়।
প্ৰাপ্ত তথ্য মতে দেৱে শুকুৰবাৰে ঘৰৰ পৰা বজাৰ কৰিবলৈ বুলি ওলাই আহিছিল। কিছু সময়ৰ পিছত তেওঁ ম’বাইল যোগে তেওঁৰ পুত্ৰক তেওঁ ঘৰলৈ ঘূৰি নহা আৰু তেওঁৰ জীৱন শেষ কৰিবলৈ যোৱা বুলি জনায়। লগতে তেওঁ পুত্ৰক মাকক ভালদৰে চোৱাচিতা কৰিবলৈ কয়।
সদৌ অসম পৌৰ কৰ্মচাৰী সংস্থাই কয় যে মৃত দেৱ পৌৰ নিগমৰ কৰ্মচাৰী সকলে তেওঁলোকৰ প্ৰাপ্য দৰমহা মোকলাই দিয়াৰ ক্ষেত্ৰত কৰা আন্দোলনৰ অন্যতম সক্ৰিয় সদস্য আছিল আৰু তেওঁৰ মৃত্যুৰ বাবে ৰাজ্য চৰকাৰেই জগৰীয়া।
লগতে আৰু কয় যে, ‘পৌৰ নিগমৰ ৯৬ জন কৰ্মচাৰীয়ে ৭ ফেব্ৰুৱাৰিৰ পৰা তেওঁলোকৰ ১৬ মাহৰ দৰমহা মোকালাই দিয়া, পৌৰ নিগমৰ কৰ্মচাৰী সকলক প্ৰাদেশীকৰণ কৰা, পেঞ্চনৰ সুবিধা প্ৰদান কৰাকে ধৰি ৮ টা বিভিন্ন দাবীত আন্দোলন অব্যাহত ৰাখিছিল। আনহাতে এই ক্ষেত্ৰত ৰাজ্য চৰকাৰে কোনো ধৰণৰ পদক্ষেপ বা সিদ্ধান্ত গ্ৰহণ কৰা নায়।