সদ্য মুক্তি প্ৰাপ্ত বলীউদৰ পেডমেন নামৰ চলচ্চিত্ৰখনত কৰা অভিনয়ৰ জৰিয়তে সুপৰিচিতি লাভ কৰা অসমৰ অভিনেত্ৰী উৰ্মিলা মহন্তই প্ৰথমবাৰৰ বাবে ভুমুকি মৰা আন্ত:ৰাষ্ট্ৰীয় চলচ্চিত্ৰ প্ৰসিদ্ধ ইৰাণী চলচ্চিত্ৰ নিৰ্মাতা মজিদ মাজিদিৰ ‘বিয়ণ্ড দ্য ক্লাউডছ’ অহা এপ্ৰিলত মুক্তিৰ বাবে সাজু হৈ উঠিছে।
এগৰাকী সুপ্ৰসিদ্ধ পৰিচালক হিচাপে পৰিচিত মাজিদিৰ বিয়ণ্ড দ্য ক্লাউডছ হৈছে ভাৰতত নিৰ্মিত প্ৰথমখন ছবি য’ত অসমৰ অভিনেত্ৰী উৰ্মিলাই এগৰাকী নাৰ্ছৰ চৰিত্ৰত অভিনয় কৰিছে।
পেডমেন ছবিখনেৰে সুখ্যাতি অৰ্জন কৰাৰ পিছত মহন্তই প্ৰকাশ কৰিছে যে, ‘’’পেডমেন’সম্পৰ্কত দৰ্শকৰ অভূতপূৰ্ব সঁহাৰি দেখি মই সঁচাকৈয়ে সুখী। চলচ্চিত্ৰ এখন কেৱল বিনোদনৰ বাবে চোৱা উচিত নহয়। এই ছবিখনে বিশেষকৈ মহিলাৰ ঋতুকালীন স্বাস্থ্য আৰু পৰিচ্ছন্নতাৰ গুৰুত্ব সম্পৰ্কে ক’ব বিচাৰিছে। মই এই ছবিখনৰ সৈতে জড়িত হ’বলৈ পাই নিজকে ভাগ্যৱান বুলি ভাৱিছো।‘’
বহু সংগঠন আৰু ব্যক্তিয়ে গুৱাহাটীকে ধৰি অসমৰ বিভিন্ন স্থানত পেডমেন মুক্তি পোৱা সপ্তাহটোতে বিনামূলীয়াকৈ ‘চেনিটাৰী নেপকিন’ বিনামূলীয়াকৈ বিতৰণ কৰিছে। মহানগৰীৰ কেইবাটাও চিত্ৰগৃহত ছবিখন বিনামূলীয়াকৈ প্ৰদৰ্শন কৰাও হৈছে।
মহিলাৰ ঋতুকালীন বিষয়টো সম্পৰ্কে থকা অস্পৃশ্যতা সম্পৰ্কত নৰ্থইষ্ট নাওৰ সৈতে হোৱা বাৰ্তালাপত উৰ্মিলাই কয়,’’নিশাটোৰ ভিতৰতে পৰিৱৰ্তন নঘটে। সজাগতা বৃদ্ধিৰ লগে লগে মানুহে পৰিৱৰ্তনৰ প্ৰয়োজনীয়তাটো উপলব্ধি কৰিব।‘’
পুনেৰ ফিল্ম এণ্ড টেলিভিশ্বন ইনষ্টিটিউট অফ ইণ্ডিয়াৰ (এফটিটিআই)ৰ প্ৰাক্তন বিদ্যাৰ্থী মহন্তই ইতিমধ্যে তামিল, হিন্দী,বাংলা আৰু অসমীয়া ছবিত অভিনয় কৰিছে।
মাজিদিৰ সৈতে কাম কৰাৰ অভিজ্ঞতাৰ কথা প্ৰকাশ কৰি উৰ্মিলাই কয়,’’মজিদ মাজিদিৰ সৈতে কাম কৰাটো এটা জীৱনৰ ডাঙৰ অভিজ্ঞতা। মোৰ এফটিটিআইৰ দিনৰে পৰা মই তেওঁৰ কামৰ অনুৰাগী হৈ পৰিছিলো। মই সপোনতো কাহানিও ভৱা নাছিলো যে মই তেওঁৰ লগত কাম কৰিম। এয়া অত্যন্ত স্মৰণীয় হৈ ৰ’ব।‘’
উৰ্মিলাৰ হাতত বৰ্তমান এখন মালয়ালাম ছবিৰ লগতে কেইখনমান অসমীয়া ছবিৰ কাম আছে।
অসমত অধিক চলচ্চিত্ৰ প্ৰেক্ষাগৃহ আৰু লগতে এক চলচ্চিত্ৰ নীতিৰ প্ৰয়োজনীয়তা সম্পৰ্কত উৰ্মিলাই কয়,’’প্ৰকৃততে অসমীয়া চলচ্চিত্ৰৰ কাৰণে এটা সঠিক সময়সূচী পোৱা কঠিন হৈ পৰিছে। উদাহৰণস্বৰূপে, মহাৰাষ্ট্ৰত আটাইতকৈ গুৰুত্বপূৰ্ণ সময়টো (প্ৰাইম টাইম শ্লট) মাৰাঠী ছবিৰ বাবে সদায় সংৰক্ষিত থাকে। অসমত চিত্ৰগৃহসমূহে আঞ্চলিক ছবিসমূহক সিমান প্ৰাধান্য নিদিয়ে।‘’
‘’ছবি উপভোগ কৰাৰ এক সংস্কৃতি গঢ়ি তোলাৰ প্ৰয়োজন আছে যাতে অধিক লোকে চিত্ৰগৃহলৈ গৈ ছবি উপভোগ কৰে। চৰকাৰ, চলচ্চিত্ৰ নিৰ্মাতা আৰু দৰ্শকৰ সন্মিলিত প্ৰচেষ্টাৰ জৰিয়তেহে পৰিৱৰ্ন আহিব পাৰে,’’-উৰ্মিলাই লগতে কয়।
