ৰাজ্যত এতিয়া চোৱাইন ফিভাৰে মহামাৰী ৰূপ ধাৰণ কৰিছে। দৈনিক শ শ গাহৰি মৃত্যু মুখত পৰাত হাহাকাৰ অৱস্থাৰ সৃষ্টি হয় গাহৰি পালকসকলৰ মাজত।
পশুপালন বিভাগে গাহৰিৰ দেহত ভেকচিন দিছে যদিও ৰোধ কৰিব পৰা নাই চোৱাইন ফিভাৰত আক্ৰান্ত গাহৰিৰ সংখ্যা।
এনে এক জটিল সময়তেই শিৱসাগৰ জিলাৰ আমগুৰিৰ বৰাহীবাৰী ৰাজ্যিক পশু চিকিৎসালয়ৰ চিকিৎসকৰ দায়িত্ব জ্ঞানহীনতাৰ বাবে অঞ্চলটোৰ ১১০০ গাহৰি মৃত্যুৰ মুখত পৰে।
স্থানীয় গাহৰি পালকৰ অভিযোগ চিকিৎসালয়খনৰ পশু-চিকিৎসক ডাঃ ইন্দু বৰাই অঞ্চলটোৰ ১১০০ গাহৰিৰ দেহত চোৱাইন ফিভাৰৰ ভেকচিনৰ সলনি প্ৰদান কৰিলে ফিটা পেলুৰ ভেকচিন।
যাৰ বাবে অঞ্চলটোৰ গাহৰিসমূহ অসুস্থ হৈ পৰাৰ লগতে বেজি দিয়া ঠাইত ঘা হৈ পোক হ’বলৈ ধৰে। ফলত এতিয়ালৈকে অঞ্চলটোৰ প্ৰায় অৰ্দ্ধ শতাধিক গাহৰিৰ মৃত্যু হৈছে।
আজি ছাত্ৰ মুক্তি সংগ্ৰাম সমিতি আৰু স্থানীয় গাহৰি পালকে বৰাহীবাৰী ৰাজ্যিক পশু চিকিৎসালয়ৰ সন্মুখত মৃত গাহৰি লগত লৈ প্ৰতিবাদ সাব্যস্ত কৰে।
চোৱাইন ফিভাৰত আৰু চিকিৎসকৰ ভূলৰ বাবে মৃত্যু হোৱা গাহৰিৰ উপযুক্ত ক্ষতিপূৰণ বিচাৰি আৰু দোষী চিকিৎসকৰ বিৰুদ্ধে ব্যৱস্থা গ্ৰহণৰ দাবীৰে এইদৰে প্ৰতিবাদ সাব্যস্ত কৰে ছাত্ৰ মুক্তি সংগ্ৰাম সমিতিয়ে।
ছাত্ৰ মুক্তি সংগ্ৰাম সমিতিৰ কেন্দ্ৰীয় সাংগঠনিক সম্পাদক ৰিতুমণি হাজৰিকাই চোৱাইন ফিভাৰত মৃত্যু হোৱা গাহৰিৰ ক্ষতিপূৰণ দিয়াৰ ব্যৱস্থা কৰাৰ বিপৰীতে মন্ত্ৰী অতুল বৰাই উপলুঙাসূচক মন্তব্য কৰি আহিছে বুলি অভিযোগ কৰে।
মন্ত্ৰীজনৰ এই কাৰ্যক ছাত্ৰ মুক্তি সংগ্ৰাম সমিতিয়ে ধিক্কাৰ জনোৱাৰ লগতে ৰাজ্যত চোৱাইন ফিভাৰত মৃত্যু হোৱা আৰু চিকিৎসকৰ ভূলৰ বাবে মৃত্যু হোৱা গাহৰিৰ বিপৰীতে গাহৰি পালকসকলক উপযুক্ত ক্ষতিপূৰণ আৰু পশু চিকিৎসক ডাঃ ইন্দু বৰাৰ বিৰুদ্ধে বিহীত ব্যাৱস্থাৰ দাবী জনায়।
