লকডাউনৰ সময়ত সুৰা বিক্ৰীৰ ওপৰত নিষেধাজ্ঞা আৰোপ কৰি কোনোধৰণৰ নিৰ্দেশ জাৰি নকৰে উচ্চতম ন্যায়ালয়ে।
আজি উচ্চতম ন্যায়ালয়ে এই কথা সদৰী কৰি কয় যে সুৰাৰ প্ৰচলন বন্ধ কৰাৰ পৰিৱৰ্তে ৰাজ্যসমূহে সুৰাৰ অনলাইন বিক্ৰী আৰম্ভ কৰাৰ কথা ভাবিব পাৰে।
ইয়াৰ জৰিয়তে তেওঁলোকে সুৰা বিপনী সমূহৰ আগত লগা গ্ৰাহকৰ ভিৰৰ পৰা হাত হাৰিব পাৰিব আৰু ছ’চিয়েল ডিস্টেনসিং বৰ্তাই ৰাখিব পাৰিব, ন্যায়ালয়ে কয়।
‘আমি কোনোধৰণৰ নিৰ্দেশ জাৰি নকৰো। ৰাজ্যসমূহে ছ’চিয়েল ডিস্টেনসিং বৰ্তাই ৰাখিবলৈ সুৰাৰ হোম ডেলিভাৰী বা পৰোক্ষভাৱে বিক্ৰী কৰাৰ কখা চিন্তা কৰিব লাগে।‘ ন্যায়ালয়ৰ নিৰ্দেশত প্ৰকাশ।
ইয়াৰ পূৰ্বে আবদনকাৰীৰ হৈ অধিবক্তা সাই দীপকে কৈছিল যে সুৰা কিনিবলৈ সুৰা বিপনীসমূহৰ আগত গ্ৰাহকে যথেষ্ট ভিৰ লগাই ছ’চিয়েল ডিস্টেনসিঙৰ নিয়ম উলংঘা কৰে।
ফলত ই সাধাৰণ মানুহৰ জীৱনৰ প্ৰতি কোভিড-১৯ত আক্ৰান্ত হোৱাৰ আশংকা কঢ়িয়াই আনিছে তেওঁ লগতে কয়।
কোভিড-১৯ৰ সংক্ৰমণ আৰু বৃদ্ধি নহয় তাৰ বাবে সকলো ৰাজ্য চৰকাৰে যাতে লকডাউনৰ নীতি-নিয়ম মানি চলা নিশ্চিত কৰে সেই ক্ষেত্ৰত গৃহ মন্ত্ৰ্যায়লক নিৰ্দেশ দিবলৈ উক্ত কাউন্সেলে উচ্চতম ন্যায়ালয়ক আহ্বান জনায়।
