সমগ্ৰ বিশ্বজুৰি কৰ’না ভাইৰাছৰ সন্ত্ৰাস আৰু তাৰ মাজতে দেশজুৰি চলি আছে তৃতীয় পৰ্য্যায়ৰ লকডাউন।
এই তৃতীয় পৰ্য্যায়ৰ লকডাউনৰ মাজতে ৰাজ্য চৰকাৰে বহিঃৰাজ্যত লকডাউনৰ ফলত আবদ্ধ হৈ থকা লোকসকলক ঘূৰাই অনাৰ বাবে সিদ্ধান্ত গ্ৰহণ কৰিছিল।
সেই অনুসৰিয়ে বহিঃৰাজ্যৰ বিভিন্ন প্ৰান্তৰ পৰা বিশেষ বাছযোগে অনা হৈছে বহু লোকক। সেই সকল লোকক কুৱাৰেণ্টাইন কৰা হৈছে সৰুসজাই ষ্টেডিয়ামৰ লগতে সীমান্তৱৰ্তী এলেকাত।
তাৰ মাজতে চৰ্চিত হৈছে এখন বিশেষ বাছৰ প্ৰসংগ। যিখন বাছ ৰাজস্থানৰ আজমেৰ শ্বৰীফৰ পৰা আহি অসমত প্ৰৱেশ কৰি গুৱাহাটী হৈ পোনে পোনে পালেগৈ কাছাৰ জিলা।
ইয়াৰোপৰি বাছখনত ৪২ গৰাকী যাত্ৰীক একেলগে অনা হৈছিল বুলি স্বাস্থ্য মন্ত্ৰী হিমন্ত বিশ্ব শৰ্মাই ইতিমধ্যে ঘোষণা কৰিছে।
লকডাউনৰ মাজতে কোনোধৰণৰ সামাজিক দূৰত্ব নামানি কেনেকৈ ৪২ জন যাত্ৰী সুদূৰ ৰাজস্থানৰ পৰা কেইবাখনো ৰাজ্য পাৰ হৈ আহি অসমত উপস্থিত হ’লহি তাক লৈয়ো এতিয়া কিছু অৱকাশ থাকি গৈছে।
ইপিনে, এইক্ষেত্ৰত বিষয়টোৰ ওপৰত গুৰুত্ব আৰোপ নকৰাৰ অভিযোগ উত্থাপন হৈছে ৰাজস্থান চৰকাৰৰ বিৰুদ্ধে।
ৰাজস্থানৰ পৰা বাছখনে উত্তৰ-প্ৰদেশ, মধ্যপ্ৰদেশ, বিহাৰ আৰু পশ্চিমবংগকে ধৰি বহুকেইখন ৰাজ্যৰ মাজেৰে পাৰ হৈ আহি অসমত প্ৰৱেশ কৰিলেহি।
অসমৰ দৰেই আন আন ৰাজ্যসমূহত সামাজিক দূৰত্ব নামানি যাত্ৰী কঢ়িয়াই অনা সত্ত্বেও বাছখনৰ বিৰুদ্ধে কোনো ব্যৱস্থা গ্ৰহণ কৰা নহ’ল কিয়?
বাছখনত অহা যাত্ৰীসকলক পোনে পোনে স্বাস্থ্য পৰীক্ষা নকৰাকৈ তেওঁলোকৰ গৃহলৈ যাবলৈ দিয়া হোৱা বুলি চ’ছিয়েল মিডিয়াযোগে এক গুৰুতৰ অভিযোগ উত্থাপন কৰিছে একাংশই।
ইতিমধ্যে কাছাৰ জিলা প্ৰশাসনে ১১ খনকৈ গাওঁ কণ্টেইনমেন্ট জ’নলৈ ৰূপান্তৰ কৰাৰ উপৰিও ৪২ গৰাকী যাত্ৰীৰ সংস্পৰ্শলৈ অহা ডেৰ শতাধিক লোকক ইতিমধ্যে কুৱাৰেণ্টাইন কৰিছে।
যোৱা ৬ মে’ৰ পৰা কালিলৈকে বাছখনৰ ১০ গৰাকী লোকৰ দেহত এই মাৰাত্মক ভাইৰাছৰ উপস্থিতি ধৰা পৰিছে তথা এই সংখ্যা বৃদ্ধি পোৱাৰো আশংকা নিশ্চয় নথকা নহয়।
এনে সময়ত সামাজিক মাধ্যমৰ জৰিয়তে বহুতে এই সন্দৰ্ভত প্ৰশ্ন উত্থাপন কৰা পৰিলক্ষিত হৈছে।
সামাজিক দূৰত্ব বৰ্তাই ৰাখি বহিঃৰাজ্যৰ পৰা আবদ্ধ হৈ থকা লোকসকলক অনা হ’ব বুলি স্বাস্থ্য মন্ত্ৰীৰ ঘোষণা যেন ফুটুকাৰ ফেনত পৰিণত কৰিলে এই ঘটনাই।
“ৰাজস্থানৰ আজমীৰৰ পৰা ৪৬ জন যাত্ৰী কঢ়িয়াই এখন বাছ শিলচৰত কেনেকৈ উপস্থিত হ’ল? অসম সীমান্তত নিৰ্ধাৰিত বিধি অনুসৰি কিয় যাৱতীয় ব্যৱস্থা গ্ৰহণ কৰা নহ’ল? অসম চৰকাৰৰ অনুমতি সাপেক্ষেহে নিশ্চয় বাছখন অসমত প্ৰৱেশ কৰিছিল,” প্ৰাক্তন মন্ত্ৰী জগদীশ ভূঞাই এইদৰে প্ৰশ্ন উত্থাপন কৰে নিজৰ টুইটাৰৰ জৰিয়তে।
ইয়াৰোপৰি, আন কেতবোৰ প্ৰশ্ন উত্থাপিত হৈছে ফেচবুকৰ জৰিয়তে।
ৰাজস্থানৰ আজমেৰ শ্বৰীফৰ পৰা অহা বাছখন কিয় পোনে পোনে যাবলৈ দিয়া হ’ল কাছাৰলৈ?
সামাজিক ব্যৱধান হেৰাল ক’ত? বহুকেইখন ৰাজ্যৰ মাজেদি কেনেকৈ এখন বাছত আহিল ৪২ জনকৈ যাত্ৰী?
কিয় সীমান্তৱৰ্তী এলেকাত বা গুৱাহাটীতে কুৱাৰেন্টাইন কৰা নহ’ল যাত্ৰীসকলক?
উল্লেখযোগ্য যে, কাছাৰৰ পৰা যোৱা ১৬ মাৰ্চত ৰাজস্থানৰ আজমেৰ শ্বৰীফ দৰ্শনৰ বাবে গৈছিল দলটো।
তাৰ পাছত ২৪ মাৰ্চৰ পৰা দেশজুৰি লকডাউন আৰম্ভ হোৱা বাবে তেওঁলোক উক্ত স্থানতে আবদ্ধ হৈ ৰৈছিল।
প্ৰাপ্ত তথ্য অনুসৰি আজমীৰ শ্বৰীফক ৰেড জ’ন হিচাপে ঘোষণা কৰিছিল ৰাজস্থান চৰকাৰে।
তাৰ পাছতো গজানন্দ ট্ৰেভেলছ নামৰ RJ 27PB 7071 নম্বৰৰ বাহনেৰে অসমৰ কাছাৰ জিলাত উপস্থিত হৈছিল ৪২ জনীয়া ভ্ৰমণকাৰী দলটো।
