নাগৰিকত্ব সংশোধনী আইন বিৰোধী আন্দোলনত জড়িত থকাৰ অভিযোগত দিল্লী আৰক্ষীয়ে শনিবাৰে (২৩ মে’) জৱাহাৰলাল নেহৰু বিশ্ববিদ্যালয়ত অধ্যয়নৰত অসমৰ এগৰকী ছাত্ৰীক গ্ৰেপ্তাৰ কৰে।
তেওঁৰ সৈতে আৰক্ষীয়ে বিশ্ববিদ্যালয়খনৰ আন এগৰাকী ছাত্ৰীকো একেটা অভিযোগতে গ্ৰেপ্তাৰ কৰিছে। ছাত্ৰী দুগৰাকীৰ নাম দেবাংগনা কলিতা আৰু নাটাশা নাৰৱাল। দুয়োগৰাকী দিল্লীৰ পিঞ্জৰা তৌড় নামৰ এটা ছাত্ৰী গোটৰ সদস্য।
উত্তৰ-পূব দিল্লীৰ জাফ্ৰাবাদত যোৱা ফেব্ৰুৱাৰিত ‘কা’ বিৰোধী এক অৱস্থান ধৰ্মঘট সংগঠিত কৰাৰ অভিযোগত ছাত্ৰী দুগৰাকীক গ্ৰেপ্তাৰ কৰা হয় বুুলি দিল্লী আৰক্ষীয়ে জানিবলৈ দিয়ে।
উল্লেখযোগ্য যে জাফ্ৰাবাদৰ উক্ত অৱস্থান ধৰ্মঘটৰ পিছত ২৩ ফেব্ৰুৱাৰিত বিজেপি নেতা কপিল মিশ্ৰই ‘কা’ৰ সমৰ্থনত এক ৰেলী অনুষ্ঠিত কৰিছিল। উক্ত ৰেলীৰ এদিন পিছতে উত্তৰ-পূব দিল্লীত হিংসাত্মক ঘটনা সংঘটিত হৈছিল।
আৰক্ষীৰ এগৰাকী বিষয়াই জনোৱা মতে ‘জাফ্ৰাবাদৰ অৱস্থান ধৰ্মঘট সম্পৰ্কত ইতিপূৰ্বে এখন এজাহাৰ দাখিল হৈ আছিল। যুৱতী দুগৰাকীক ভাৰতীয় দণ্ডবিধিৰ ১৮৬ আৰু ৩৫৩ ধাৰাৰ অধীনত গ্ৰপ্তাৰ কৰা হয়।’
পিঞ্জৰা তৌড়ৰ এক বিবৃতিত কয়, ‘জাফ্ৰাবাদ আৰক্ষীয়ে ৰুজু কৰা এখন এজাহাৰৰ ভিত্তিত তেওঁলোকক ঘৰৰ পৰা গ্ৰেপ্তাৰ কৰা হয়। তেওঁলোক বৰ্তমান জাফ্ৰাবাদ আৰক্ষী থানাত আছে। আৰক্ষীয়ে তেওঁলোকৰ পৰিয়ালৰ লোকক গ্ৰেপ্তাৰৰ কাৰণ জনোৱা নাই।‘
‘দিল্লী আৰক্ষীয়ে যোৱা কেইটামান মাহত বহু ছাত্ৰ-ছাত্ৰী আৰু সংগঠনৰ কৰ্মীক গ্ৰেপ্তাৰ কৰিছে। গণতন্ত্ৰৰ হকে মাত মতা কৰ্মী আৰু ছাত্ৰ-ছাত্ৰীসকলক ৰাষ্টই এইদৰে হাৰাশাস্তি কৰি থকাটোক আমি নিন্দা কৰিছো আৰু ছাত্ৰ সমাজ আৰু গণতান্ত্ৰিক মনৰ সকলো নাগৰিকক এই দমনৰ বিৰুদ্ধে নিজক সতৰ্ক আৰু সবল ৰাথিবলৈ আহ্বান জনাইছো।‘ বিবৃটোত লগতে কোৱা হয়।
দিল্লী আৰক্ষীয়ে ‘ভুৱা অভিযোগ’ জাপি এইদৰে গ্ৰেপ্তাৰ কৰা ‘কা’ বিৰোধী প্ৰতিবাদকাৰী সকলক মুকলি কৰি দিবলৈ মানৱ অধিকাৰ সংস্থা এমনেষ্টি ইণ্টাৰনেশ্যনেল, বিভিন্ন ছাত্ৰ সংগঠন, শিক্ষক সংস্থা, নাগৰিক সমাজকে ধৰি দেশৰ সচেতন মহলে দাবী জনাইছে।
উল্লেখযোগ্য যে কালি গ্ৰপ্তাৰ কৰা দেবাংগনা কলিতা JNUৰ চেণ্টাৰ ফৰ ৱ’মেন ষ্টাডিছ আৰু নাটাশা নাৰৱাল চেণ্টাৰ ফৰ হিষ্ট’ৰিকেল ষ্টাডিছৰ ছাত্ৰী। ছ’চিয়েল মিডিয়াত অসমৰ লগতে দেশৰ বিভিন্নজনে ছাত্ৰী দুগৰাকীক গ্ৰেপ্তাৰ কৰা কাৰ্য্যক গৰিহণা দিয়াৰ লগতে তেওঁলোকক মুকলি কৰি দিবলৈ দাবী জনায়।
