ক’ৰ’না মহামাৰীৰ আতংকৰ বাবে আৰ্থিকভাৱে দূৰ্বল হৈ পৰা পৰিয়ালসমূহৰ ছাত্ৰ-ছাত্ৰীক সকাহ দিয়াৰ উদ্দেশ্যে শিৱসাগৰৰ এডুটেক একাডেমী জুনিয়ৰ কলেজে নামভৰ্তিৰ ক্ষেত্ৰত বিশেষ ৰেহাই দিয়াৰ সিদ্ধান্ত লৈছে।
দীৰ্ঘদিনীয়া লকডাউন পৰিপেক্ষিতত হোৱা অচলাৱস্থা আৰু আর্থিক বিশৃংখলতা বাবে ছাত্ৰ-ছাত্ৰীসকল যথেষ্ট সমস্যাৰ সন্মুখীন হৈছে। ইয়াৰ প্ৰতি লক্ষ্য ৰাখি উক্ত শিক্ষানুষ্ঠানখনে আর্থিকভাৱে সচ্ছল নোহাৱা পৰিয়ালৰ ছাত্ৰ-ছাত্ৰীসকললৈ নামভৰ্তিত ৫০ শতাংশ ৰেহাইৰ ঘোষণা কৰে।
এই ৰেহাই প্ৰযোজ্য হ’ব বি পি এলৰ কাৰ্ড থকা সকলো পৰিয়াল, কৃষক পৰিয়াল, অসংগঠিত শ্রেণীৰ শ্রমিক, নির্মাণখণ্ডৰ শ্ৰমিক, ক্ষুদ্র ব্যৱসায়ী, বেচৰকাৰী পৰিবহনখণ্ডৰ শ্ৰমিক, ব্যক্তিগতখণ্ডৰ প্ৰতিষ্ঠানত কৰ্মৰত ব্যক্তি, স্বাস্থ্যখণ্ডৰ অনিয়মীয়া কর্মচাৰী, স্বনিয়োজিত কর্মত জড়িত ব্যক্তিসকলৰ লগতে চহীদ পৰিয়ালৰ সন্তান আৰু বিশেষভাৱে সক্ষম ছাত্ৰ-ছাত্ৰীৰ বাবে।
ইয়াৰ উপৰিও মেধা-সম্পন্ন ছাত্ৰ-ছাত্ৰীৰ বাবে শিক্ষানুষ্ঠানত বিশেষ জলপানিৰ ব্যৱস্থা ৰখা হৈছে। শিক্ষানুষ্ঠানখনে শিক্ষাৰ্থীৰ বাবে edutechsivasagar.in নামৰ এটা ৱেবছাইটো মুকলি কৰিছে।
যিসকল ছাত্ৰ-ছাত্ৰীয়ে স্মাৰ্ট ফোন নথকাৰ বাবে অনলাইন শিক্ষা লাভৰ পৰা বঞ্চিত আছে সেইসকলক প্রতি সপ্তাহত লিখিত study materials যোগান ধৰিবলৈ সিদ্ধান্ত গ্ৰহণ কৰা হৈছে বুলি জুনিয়ৰ কলেজৰ অধ্যক্ষ ৰঞ্জিৎ তামুলীয়ে সদৰী কৰে।
