চীনক প্ৰত্যুত্তৰ দিয়াৰ বাবে মোদী চৰকাৰক আহ্বান জনাইছে প্ৰাক্তন প্ৰধান মন্ত্ৰী ড০ মনমোহন সিঙে।
লাডাখ সীমান্তত শ্বহীদ হোৱা জোৱানলৈ শ্ৰদ্ধাঞ্জলি জনাই প্ৰাক্তন প্ৰধান মন্ত্ৰী ড০ সিঙে কয় যে জোৱানসকলৰ ত্যাগ অথলে যোৱা উচিত নহয়।
তেওঁ কয় যে সমগ্ৰ দেশে একত্ৰিত হৈ সংগঠিতভাৱে তেওঁলোকৰ দু:সাহসৰ প্ৰত্যুত্তৰ দিয়াৰ এয়াই সময়।
প্ৰাক্তন প্ৰধান মন্ত্ৰীগৰাকীয়ে কয়,’’যোৱা ১৫-১৬জুনত গলৱান উপত্যকাত ভাৰতৰ ২০গৰাকী সাহসী জোৱানে জীৱন উৎসৰ্গা কৰিলে। দেশৰ এই সন্তানসকলে শেষ নিশ্বাস ত্যাগ কৰালৈকে দেশক ৰক্ষা কৰিলে। এই সৰ্বোচ্চ ত্যাগৰ বাবে আমি এই সাহসী সৈনিক তথা তেওঁলোকৰ পৰিয়ালৰ প্ৰতি কৃতজ্ঞ। কিন্তু তেওঁলোকৰ এই বলিদান অথলে যোৱা উচিত নহয়।‘’
ড০ সিঙে লগতে কয় যে আজি আমি ইতিহাসৰ এক সংকটপূৰ্ণ অৱস্থাত থিয় হৈছো। আমাৰ চৰকাৰৰ সিদ্ধান্ত আৰু চৰকাৰৰ পদক্ষেপে নিৰ্দ্ধাৰণ কৰিব আমাৰ ভৱিষ্যৎ প্ৰজন্মই আমাক কিদৰে মূল্যায়ন কৰে।
তেওঁ কয় যে যিসকলে দেশৰ নেতৃত্ব দিছে তেওঁলোকৰ কান্ধত কৰ্তব্যৰ গধূৰ দায়িত্ব আছে। আমাৰ গণতন্ত্ৰত এই দায়িত্ব প্ৰধান মন্ত্ৰীৰ।
প্ৰাক্তন প্ৰধান মন্ত্ৰীগৰাকীয়ে কয় যে প্ৰধান মন্ত্ৰীয়ে তেওঁৰ ভাষ্য আৰু ঘোষণাৰ দ্বাৰা দেশৰ সুৰক্ষা আৰু সামৰিক তথা ভূখণ্ডত পৰিবলগীয়া প্ৰভাৱৰ প্ৰতি সদায় অত্যন্ত সতৰ্ক থকা উচিত।
তেওঁ কয় যে চীনে এপ্ৰিলৰ পৰা আজিলৈকে গলৱান উপত্যকা তথা পেংগং সো লেকত বহুৱাৰ জোৰকৈ অনুপ্ৰৱেশ কৰিছে।
ড০ মনমোহন সিঙে কয় যে আমি তেওঁলোকৰ ধমকি বা চাপৰ সন্মুখত না নতি স্বীকাৰ কৰিম না সাৰ্বভৌমত্বক লৈ কোনো আপোচ কৰিম। প্ৰধান মন্ত্ৰীয়ে তেওঁৰ বক্তব্যৰে ষড়যন্ত্ৰকাৰী শক্তিক উৎসাহ দিয়া উচিত নহয়।
চৰকাৰে ইয়াৰ সকলো বিভাগকে এই বিপদৰ মুখামুখি হ’বলৈ তথা স্থিতি অধিক গুৰুতৰ হোৱাৰ পৰা ৰক্ষা কৰিবলৈ পাৰস্পৰিক সহযোগিতাৰে কাম কৰাটো সুনিশ্চিত কৰিব লাগে।
তেওঁ চৰকাৰক আহ্বান জনাই কয় যে বিভ্ৰান্তিকাৰী প্ৰচাৰ কেতিয়াও কূটনীতি তথা শক্তিশালী নেতৃত্বৰ বিকল্প হ’ব নোৱাৰে।
