ক’ৰ’না মহামাৰীৰ সংকটৰ সময়তে প্ৰধান মন্ত্ৰী নৰেন্দ্ৰ মোদীয়ে আজি ৰাষ্ট্ৰক সম্বোধন কৰে।
ৰাষ্ট্ৰক সম্বোধি দিয়া ভাষণত প্ৰধান মন্ত্ৰী মোদীয়ে আনল’ক-২-ত জনসাধাৰণৰ ক’ৰ’না সম্পৰ্কে সজগতা হ্ৰাস পোৱা বিষয়ত উদ্বেগ প্ৰকাশ কৰে।
সকলোকে এই জটিল সময়ত স্বাস্থ্য সন্মত নীতি-নিৰ্দেশনা সমূহ কঠোৰভাৱে পালন কৰি ১৩০ কোটি জনসাধাৰণৰ জীৱন সুৰক্ষিত কৰাৰ বাবে চলি থকা অভিযানত চৰকাৰক সহায় কৰাৰ বাবে আহ্বান জনায়।
আনহাতে, প্ৰধান মন্ত্ৰী নৰেন্দ্ৰ মোদীয়ে ক’ৰ’নাৰ সংক্ৰমণৰ সময়ত আগন্তুক উৎসৱৰ সময়ছোৱাত যাতে দেশৰ নাগৰিক সকল লঘোণে থাকিবলগীয়া নহয় সেই উদ্দেশ্যে প্ৰধান মন্ত্ৰী গৰীব কল্যাণ আঁচনি নৱেম্বৰ মাহলৈ বৃদ্ধি কৰাৰ কথা ঘোষণা কৰে।
এই আঁচনিৰ অধীনত ভাৰতৰ মুঠ ৮০ কোটি লোকে আগন্তুক পাঁচ মাহৰ বাবেও প্ৰতিগৰাকী সদস্যৰ বিপৰীতে পাঁচ কিলো চাউল অথবা পাঁচ কিলো ঘেঁহু আৰু প্ৰতিটো পৰিয়াললৈ এক কিলোকৈ দাইল বিনামূলীয়াকৈ আগবঢ়োৱা হ’ব বুলি প্ৰধান মন্ত্ৰীয়ে কয়।
পৰিয়াল সমূহে এই সময়ত এক কিলোকৈ মটৰো লাভ কৰিব।
নৱেম্বৰলৈ চলিবলগীয়া প্ৰধান মন্ত্ৰী গৰীৱ কল্যাণ যোঁজনাৰ বাবে চৰকাৰৰ মুঠ ডেৰ লাখ কোটি টকা ব্যায় হ’ব বুলি মোদীয়ে উল্লেখ কৰে।
ভাৰতৰ গৰীৱ কল্যাণ যোজনাৰ অধীনত আমেৰিকা যুক্তৰাষ্ট্ৰৰ জনসংখ্যাৰ ডেৰ গুণ তথা ব্ৰিটেইনৰ জনসংখ্যাৰ বাৰ গুণ লোকক দেশত খাদ্যৰ যোগান ধৰা হৈছে আৰু হ’ব বুলিও নৰেন্দ্ৰ মোদীয়ে কয়।
