অভিযুক্ত ব্যক্তিৰ পৰা শকত পৰিমানৰ ধন উৎকোচ হিচাপে দাবী কৰি ধৰ্ষণৰ গোচৰ গাপ দি ৰখাৰ এক গুৰুতৰ অভিযোগ উঠিছে আহমেদাবাদ মহিলা থানাৰ ভাৰপ্ৰাপ্ত বিষয়াৰ বিৰুদ্ধে।
উক্ত মহিলা বিষয়াগৰাকীৰ বিৰুদ্ধে এজাহাৰ দাখিল কৰা হৈছে আৰু যিকোনো সময়তে বিষয়াগৰাকীক গ্ৰেপ্তাৰ কৰা হ’ব পাৰে।
বাতৰি অনুসৰি, জিএপি কৰ্প ছাইন্স নামৰ এটা বেচৰকাৰী সংস্থাৰ পৰিচালন সঞ্চালক কেনাল শ্বাহৰ বিৰুদ্ধে মহিলা থানাখনত সংস্থাটোৰ দুগৰাকী মহিলা কৰ্মচাৰীয়ে ধৰ্ষণৰ অভিযোগ দিছিল।
যোৱা মাহত ঘটনাটোৰ অন্যতম সাক্ষী সংস্থাটোৰ ছিকিউৰিটি অ’ফিচাৰগৰাকীয়ে কেনাল শ্বাহৰ বিৰুদ্ধে থানাত ভাবুকি দিয়াৰ এক সুকীয়া অভিযোগ দাখিল কৰিছিল।
উক্ত ধৰ্ষণৰ গোচৰ দুটাৰ এটা গোচৰৰ তদন্তৰ দায়িত্বত লাভ কৰিছিল থানাখনৰ উপ-আৰক্ষী পৰিদৰ্শক তথা বৰ্তমান থানাখনৰ ভাৰপ্ৰাপ্ত বিষয়া শ্বেতা জাদেজাই।
অভিযোগ অনুসৰি, অভিযুক্ত কেনাল শ্বাহক গ্ৰেপ্তাৰ নকৰাৰ বিনিময়ত ৩৫লাখ টকা উৎকোচ বিচাৰে তদন্তকাৰী এই মহিলা বিষয়াগৰাকীয়ে।
তদুপৰি, এই ধন আদায় নিদিলে মহিলা সহকৰ্মী দুগৰাকীক ধৰ্ষণ কৰা তথা ছিকিউৰিটি বিষয়াক ভাবুকি দিয়াৰ অভিযোগত গোচৰ তৰাৰ ভাবুকি দিয়ে।
মহালা বিষয়াগৰাকীৰ বিৰুদ্ধে ক্ৰাইম ব্ৰাঞ্চে দাখিল কৰা অভিযোগত এই কথা উল্লেখ কৰা হৈছে।
বাতৰি অনুসৰি, চাৰি বছৰ পূৰ্বে আৰক্ষীৰ চাকৰিত যোগ দিছিল শ্বেতা জাদেজাই।
মহিলা আৰক্ষী বিষয়াগৰাকীয়ে অভিযুক্ত কেনাল শ্বাহৰ জ্যেষ্ঠ ভাতৃ ভবেশ শ্বাহক থানালৈ মাতি আনি ২৫ লাখ টকা নিদিলে কেনাল গ্ৰেপ্তাৰ কৰা হ’ব বুলি জনায়।
অৱশেষত ২০ লাখ টকাত বুজাবুজি কৰা হয়। মহিলা বিষয়াগৰাকীয়ে ভবেশ শ্বাহক নিজৰ এগৰাকী চিনাকি ব্যক্তিৰ জৰিয়তে টকাখিনি আদায় দিবলৈ কয়।
সেই মতে কেনালৰ ভাতৃয়ে উক্ত ব্যক্তিৰ একাউন্টত টকাখিনি পঠাই দিয়ে।
কিন্তু কেইদিনমান পাছত কেনাল শ্বাহৰ ভাতৃক পুনৰ থানালৈ মাতি পঠায় মহিলা বিষয়াগৰাকীয়ে।
মহিলাগৰাকীয়ে এইবাৰ কেনাল শ্বাহৰ বিৰুদ্ধে আন এটি ভাবুকিৰ গোচৰত গ্ৰেপ্তাৰৰ পা বচাবলৈ আকৌ ২০ লাখ টকা দাবী কৰে।
এইবাৰ ১১ লাখ টকাত বুজাবুজি হয় আৰু পূৰ্বৰ দৰেই বিষয়াগৰাকীৰ চিনাকি ব্যক্তিৰ একাউন্টত টকাখিনি জমা কৰে।
ইয়াৰ মাজতে, যোৱা মাহত মহিলা আৰক্ষী বিষয়াগৰাকীৰ বিৰুদ্ধে কেনাল শ্বাহৰ ভাতৃ ভবেশ শ্বাহে আৰক্ষীৰ উৰ্ধতন কৰ্তৃপক্ষৰ ওচৰত অভিযোগ দাখিল কৰে।
তেওঁৰ অভিযোগৰ ভিত্তিত এগৰাকী আন উপ-পৰিদৰ্শকে তদন্ত আৰম্ভ কৰে আৰু সকলো তথ্য প্ৰমান সংগ্ৰহ কৰে।
ক্ৰাইম ব্ৰাঞ্চে মহিলা আৰক্ষী বিষয়া শ্বেতা জাদেজাৰ বিৰুদ্ধে এজাহাৰ দাখিল কৰিছে আৰু উৎকোচ লোৱা বিষয়া গৰাকীক গ্ৰেপ্তাৰৰ প্ৰস্তুতি চলাইছে।
