বন মহোৎসৱৰ লগত সংগতি ৰাখি বোকাখাতৰ জে ডি এছ জি মহাবিদ্যালয়ে হাতত লোৱা বৃক্ষ ৰোপণ আঁচনিৰে আজি বোকাখাত নগৰৰ বিভিন্ন শিক্ষানুষ্ঠান আৰু অনান্য অনুষ্ঠানৰ প্ৰাঙ্গনত বৃক্ষ ৰোপণ কৰে৷
মহাবিদ্যালয়খনৰ ৰাষ্ট্ৰীয় সেৱা আঁচনিৰ ছাত্ৰ-ছাত্ৰীৰ লগতে শিক্ষক শিক্ষয়ত্ৰীয়েও বৃক্ষ ৰোপণৰ এই অভিযানত অংশ গ্ৰহণ কৰে৷
এই উপলক্ষে আজি পুৱা বোকাখাত নগৰৰ মুঙ্গীলাল কৃষ্ণাদেৱী বিদ্যালয়ত আয়োজিত আৰু মহাবিদ্যালয়ৰ অধ্যক্ষ ড৹ জয়ন্ত গগৈয়ে পৌৰোহিত্য কৰা বিশেষ অনুষ্ঠানত বোকাখাতৰ মহকুমা আৰক্ষী বিষয়া পৃথ্বীৰাজ ৰাজখোৱা, অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা, অনাৰেৰী ৱাইল্ড লাইফ ৱাৰ্ডেন উত্তম শইকীয়া, সমাজিক বনানিকৰণ বিভাগৰ বনবিষয়া মহিম হাজৰিকা, মহাবিদ্যালয়ৰ ৰাষ্ট্ৰীয় সেৱা আঁচনিৰ সমন্বয়ক প্ৰশান্ত ফুকন আৰু প্ৰশান্ত শইকীয়াৰ উপৰিও শিক্ষক কৰ্মচাৰীয়েও আৰু ছাত্ৰ ছাত্ৰীয়ে অংশ গ্ৰহণ কৰে৷
এই অভিযানেৰে বোকাখাতৰ বিভিন্ন অনুষ্ঠানৰ প্ৰাংগনত জে ডি এছ জি মহাবিদ্যালয়ৰ ৰাষ্ট্ৰীয় সেৱা আঁচনিৰ ছাত্ৰ-ছাত্ৰীয়ে শতাধিক বৃক্ষ ৰোপণ কৰি পৰৱৰ্তী সময়ত প্ৰতিপালন কৰিব বুলি অধ্যক্ষ ড৹ জয়ন্ত গগৈয়ে জনায়৷
অনুষ্ঠানত বক্তব্য ৰাখি জেষ্ঠ সাংবাদিক জিতু শৰ্মা ৰাজখোৱাই বোকাখাতৰ বান্দৰৰ সমস্যাৰ প্ৰতি লক্ষ্য ৰাখি এই অভিযানত থলুৱা ফলমুলৰ গছ ৰোপণ কৰাৰ বাবে আহ্বান জনায়৷
অনুষ্ঠানৰ শেষত উপস্থিত ব্যক্তিসকলে ছাত্ৰ-ছাত্ৰীৰ লগতে বৃক্ষ ৰোপণ কাৰ্যসূচীত অংশ গ্ৰহণ কৰে৷
