প্ৰসিদ্ধ জৈৱ-প্ৰযুক্তিৰ কোম্পানী বায়’কনে সোমবাৰে সদৰী কৰিছে যে তেওঁলোকে মধ্যমীয়া অসুস্থতাৰ পৰা সংকটজনক কোভিড-১৯ ৰোগীৰ চিকিৎসাৰ বাবে বায়’লজিকেল দৰৱ ইট’লিজুমাব বজাৰলৈ আনিব।
এই দৰৱৰ দাম হ’ব প্ৰতি বটলত ৮,০০০টকা।
কোম্পানীটোৱে জানিবলৈ দিয়ে যে কোভিড-১৯ৰ বাবে মজলীয়াৰ পৰা গুৰুতৰভাৱে তীব্ৰ শ্বাস কষ্টৰ উপসৰ্গৰ ক্ষেত্ৰত ছাইট’কাইন ৰিলিজ ছিন্ড্ৰ’মৰ নিদানৰ বাবে ভাৰতত জৰুৰীকালীন ব্যৱহাৰৰ বাবে ইট’লিজুমাব ইনজেকশ্যন (২৫ মি:গ্ৰা:/৫মি:লি:)ৰ বিক্ৰীৰ বাবে মুকলি কৰিব।
এইক্ষেত্ৰত কোম্পানীটোৱে ভাৰতৰ ঔষধ নিয়ন্ত্ৰক (ডিচিজিআই)ৰ পৰা অনুমতি লাভ কৰিছে।
বায়’কনে ইয়াৰ পূৰ্বে এক সাধাৰণ জাননীত কৈছিল যে ইট’লিজুমাব বিশ্বৰ সকলোতে স্বীকৃত প্ৰথম এনেকুৱা বায়’লজিকেল দৰৱ যাৰ দ্বাৰা কোভিড-১৯ৰ গুৰুতৰ জটিলতাত ভোগা ৰোগীৰ চিকিৎসা কৰা হয়।
কোম্পানীটোৰ কাৰ্যবাহী অধ্যক্ষ কিৰন মজুমদাৰ-শ্ব’ই এখন অনলাইন সংবাদমেলত কয় যে ‘’যেতিয়ালৈকে ভেকচিন নোলায়, তেতিয়ালৈকে আমাৰ জীৱন দায়িনী দৰৱৰ প্ৰয়োজন আছে। আমি বিশ্বত যিধৰণে কৰিছে, ঠিক তেনেধৰণে এই মহামাৰীৰ চিকিৎসাৰ বাবে দৰৱৰ পুনৰ প্ৰয়োগ কৰিব পাৰো বা নতুন দৰৱ বিকশিত কৰিব পাৰো।‘’
তেওঁ লগতে কয় যে হয়তো চলিত বছৰৰ শেষৰ পিনে বা আগন্তুক বছৰৰ আৰম্ভণিত আমি ভেকচিন লাভ কৰিব পাৰো যদিও দ্বিতীয়বাৰ সংক্ৰমণ নোহোৱাৰ কোনো নিশ্চয়তা নাই।
সেইদৰে আমি যিদৰে ই কাম কৰিব বুলি ভাৱি আছো সেইদৰেই ই কাম কৰিব তাৰো কোনো নিশ্চয়তা নাই। গতিকেই আমি প্ৰস্তুত হৈ থকাটো জৰুৰী।
