যোৰহাট জিলা প্ৰশাসনে ক’ভিড-১৯ৰ ব্যাপক সংক্ৰমণৰ প্ৰতি লক্ষ্য ৰাখি সদৰ চহৰ আৰু ইয়াৰ উপকণ্ঠ অঞ্চলত বৃহস্পতিবাৰৰ পৰা অনিৰ্দিষ্টকালীন লকডাউন ঘোষণা কৰিছে।
চহৰখনত বৰ্তমানো বলৱৎ থকা লকডাউন কেৱল যোৰহাট পৌৰ এলেকাত সীমাবদ্ধ আছিল, কিন্তু বুধবাৰে নতুনকৈ ঘোষিত লকডাউনে চহৰৰ কাষৰীয়া ঠাইসমূহো সামৰি ল’ব।
যোৰহাট চহৰত ইতিমধ্যে বলৱৎ থকা লকডাউনৰ আজি অন্তিম দিন।
জিলা উপায়ুক্ত ৰশ্নি এ ক’ৰাতিয়ে জাৰি কৰা নিৰ্দেশমতে নতুন লকডাউনে সামৰা অঞ্চল হৈছে চিনামৰা তিনিআলি, লিচুবাৰী চাৰিআলি, ৰৰৈয়া চাৰিআলি, অজন্তা বায়পাছ, মালৌ আলি বায়পাছ, সৰ্বাইবন্ধা বায়পাছ, কেন্দুগুৰি বায়পাছ, জে ই চি গেট, গড়মূৰ, জে ই চি কেম্পাছ, সোণাৰী গাওঁ হৈ এ টি ৰ’ডৰ পৰা জেল তিনিআলি, ৰ’ড নং ১, এ এ ইউ চৌহদকো ধৰি সদৰ তিনিআলিৰ পৰা লিচুবাৰী হৈ জেল তিনিআলি।
লকডাউনৰ সময়চোৱাত গেলামালৰ পাইকাৰী আৰু খুচুৰা দোকান খোলাৰ অনুমতি দিয়া হৈছে।
পাইকাৰী দোকানসমূহ পুৱা সাতৰ পৰা দুপৰীয়া ১২ আৰু খুচুৰা দোকানসমূহ দুপৰীয়া ১২ৰ পৰা সন্ধিয়া ছয় বজালৈ খোলাৰ অনুমতি দিয়া হৈছে।
তাৰোপৰি শাক-পাচলি, মাছ-মাংস, ফলমূল আৰু খোৱাপানীৰ হ’ম ডেলিভাৰি কৰাৰ অনুমতি দিয়া হৈছে।
যোৰহাটত আজি ৭৭গৰাকী ক’ভিড পজিটিভ ব্যক্তি চিনাক্ত হৈছে। তাৰে ৭০ৰ জনৰে ভ্ৰমণৰ ইতিহাস নাই।
জানিব পৰা মতে যোৰহাট চিকিৎসা মহাবিদ্যালয় আৰু হস্পিটেলৰ চিকিৎসককে ধৰি ২৫গৰাকী কৰ্মচাৰী ক’ভিড পজিটিভ চিনাক্ত হৈছে।
জিলাখনত বৰ্তমান সক্ৰিয় ক’ভিড ৰোগীৰ সংখ্যা ২৬২ আৰু ২৪৫গৰাকী লোক এতিয়ালৈকে আৰোগ্য হৈছে।
