এগৰাকী আফগান কিশোৰীয়ে মঙলবাৰে দুই দুধৰ্ষ তালিবানী সন্ত্ৰাসবাদীক এ কে ৪৭ ৰাইফলেৰে গুলীয়াই হত্যা কৰিছে।
আফগান চৰকাৰী সূত্ৰই প্ৰকাশ কৰিছে এই কথা।
কিশোৰীগৰাকীৰ উক্ত গুলীচালনাত কেবাটাও তালিবানী সন্ত্ৰাসবাদী আহত হোৱা বুলি দাবী কৰিছে সূত্ৰটোৱে।
সংবাদ প্ৰতিষ্ঠানৰ বাতৰি অনুসৰি আফগানিস্তানৰ চেন্ট্ৰেল প্ৰ’ভিন্সৰ ঘোৰ এলেকাৰ কুৰ্নাৰ গুল নামৰ কিশোৰী গৰাকীয়ে নিজ পিতৃ-মাতৃক হত্যা কৰা প্ৰতিশোধ ল’বলৈকে তালিবানী সন্ত্ৰাসবাদীৰ ওপৰত গুলীচালনা কৰিছিল।
স্থানীয় আৰক্ষী বিষয়া হাবিবুৰাহমান মালেকজাদে সংবাদ প্ৰতিষ্ঠানক কোৱা অনুসৰি কিশোৰী গৰাকী পিতৃ আছিল আফগান চৰকাৰৰ সমৰ্থক।
চৰকাৰৰ সমৰ্থক হোৱাৰ বাবে তালিবানী সন্ত্ৰাসবাদীৰ দলে কিশোৰী গৰাকীৰ পিতৃক ঘৰৰ পৰা চোঁচৰাই নি হত্যা কৰে। পিতৃক ৰক্ষা কৰিবলৈ আগবাঢ়ি যোৱা কিশোৰী গৰাকীৰ মাতৃসহ আন এজনকো হত্যা কৰে সন্ত্ৰাসবাদী দলটোৱে।
ইয়াৰ পিছতে ঘৰত থকা এ কে ৪৭ ৰাইফলটোৰে কিশোৰীগৰাকীয়ে সন্ত্ৰাসবাদী দলটোৰ ওপৰত গুলীচালনা কৰে।
“ঘৰৰ ভিতৰত থকা কুৰ্মাৰ গুলে ঘৰত থকা এ কে ৪৭ ৰাইফল এটা লৈ প্ৰথমে পিতৃ-মাতৃক হত্যা কৰা দুটা তালিবানী সন্ত্ৰাসবাদীক গুলীয়াই হত্যা কৰে। আৰু অন্য কেইটামান সন্ত্ৰাসবাদী আহতও হৈছে।” আৰক্ষী বিষয়া গৰাকীয়ে সংবাদ মাধ্যমক কয়।
ইয়াৰ পিছতে তালিবানী সন্ত্ৰাসবাদীৰ দলে কিশোৰী গৰাকী ঘৰত পুনৰ আক্ৰমণ কৰে।
কিছু সংখ্যক গঞাৰ সহযোগত চৰকাৰী নিৰাপত্তা বাহিনীয়ে গুলীচালনাৰ পিছতে নিৰাপদ স্থানলৈ লৈ যোৱাৰ ফলত কিশোৰীগৰাকীৰ জীৱন ৰক্ষা পৰে।
স্থানীয় আৰক্ষীৰ মতে কিশোৰী গৰাকীৰ বয়স ১৪ৰ পৰা ১৬ বছৰ ভিতৰত হ’ব।
