বিহাৰৰ আৰৰিয়া জিলাৰ তাৰাবাৰী থানা এলেকাত বুধবাৰে মাজ নিশা এখন দ্ৰুতবেগী গাড়ী নিয়ন্ত্রণ হেৰুৱাই বিডি দলঙৰ ৰেলিং ভাঙি পানীত বাগৰি পৰে৷ পানীত ডুবি মৃত্যু হয় ছয়জন যাত্ৰীৰ। এজনক স্থানীয় লোকে উদ্ধাৰ কৰে।
স্থানীয় সূত্ৰৰ পৰা জানিব পৰা মতে, গাড়ীখন নদীত পৰি যোৱাৰ শব্দ আৰু যাত্ৰীসকলৰ চিঞৰ-বাখৰ শুনি প্ৰথমে স্থানীয় ৰাইজে লৰালৰিকৈ তালৈ আহে। গাড়ীখনৰ লগতে উটি যোৱা লোককেইজনক উদ্ধাৰ কৰিবলৈ স্থানীয় একাংশ লোকে পানীত জাপ দিয়ে।
তথ্য লাভ কৰাৰ লগে লগে আৰক্ষী আৰু দুৰ্যোগ ব্যৱস্থাপনা কৰ্মীসকলে সেই স্থানলৈ গৈ উদ্ধাৰৰ কাম আৰম্ভ কৰে। গাড়ীখনত আবদ্ধ হৈ থকা যাত্ৰীসকলক উদ্ধাৰ কৰি ক্ষীপ্ৰতাৰে আৰাৰিয়া সদৰ চিকিৎসালয়লৈ লৈ যোৱা হয়। প্ৰাথমিক পৰীক্ষাৰ অন্তত চিকিৎসকে ৬ জন লোকক মৃত ঘোষণা কৰে। দুৰ্ঘটনাত গুৰুতৰভাৱে আহত এজন যাত্ৰী চিকিৎসালয়ত চিকিৎসাধীন হৈ আছে।
আৰক্ষীৰ সূত্ৰ অনুসৰি নিহত কেইজন হৈছে গাড়ীৰ চালক কুন্দন কুমাৰ (২৬), যশ কুমাৰ (১৫), আদিত্য আনন্দ (১৮), আৰিয়ান (১৫), সৌৰভ (১৬) আৰু মুন্না কুমাৰ (১৪)। আটাইকেইজনে সুপৌল জিলাৰ পিপৰা ব্লকৰ থুম্হা গাঁৱৰ বাসিন্দা।
আৰয়াৰিয়াৰ ছিকিতিৰ ভপটীয়া গাঁৱত জোৰণ অনুষ্ঠানৰ পৰা কইনাৰ পৰিয়ালে স্কৰপিঅ’ গাড়ীৰে ঘৰলৈ উভতি আহিছিল। বিডি দলঙৰ পাক লোৱাৰ সময়তে স্ক’ৰপিঅ’ গাড়ীখন নিয়ন্ত্ৰণ হেৰুৱাই মাৰিয়া নদীত বাগৰি পৰে।
দুৰ্ঘটনাৰ খবৰ পোৱাৰ লগে লগে থুম্হা গাঁৱত শোকৰ ছাঁ নামি আহে। তাৰাবাৰী আৰক্ষী থানাই জনোৱা মতে, দুৰ্ঘটনাৰ কাৰণ এতিয়াও স্পষ্ট হোৱা নাই। প্ৰথম অৱস্থাত তীব্ৰ গতিৰ বাবে চালকজনে নিয়ন্ত্ৰণ হেৰুৱাই গাড়ীখন নদীত বাগৰি পৰাৰ সন্দেহ কৰে। আৰক্ষীয়ে মৃতদেহকেইটা মৰণোত্তৰ পৰীক্ষাৰ বাবে প্ৰেৰণ কৰিছে।





