সমগ্ৰ বিশ্বই কোভিড১৯ মহামাৰীত ত্ৰস্তমান।
ভাৰততো হোৰাহোৰে বাঢ়িছে কোভিড আক্ৰান্তৰ সংখ্যা। বাঢ়িছে আক্ৰান্তৰ মৃত্যুৰ সংখ্যাও। কোভিড প্ৰতিৰোধৰ বাবে দেশত বৰ্তমানেও চলি আছে বিভিন্ন পৰ্যায়ৰ ল’কডাউন তথা আনল’কৰ দৰে ব্যৱস্থা।
এনে এক আতংকময় পৰিৱেশতে ভাৰতৰ বাবে সুখবৰ প্ৰকাশ পাইছে সংবাদ মাধ্যমত।
উল্লেখ্য যে, সমগ্ৰ বিশ্বৰ চিকিৎসা বিজ্ঞানীসকলে কোভিড১৯ প্ৰতিষেধক আৱিষ্কাৰত ব্যস্ত থকাৰ সময়তে ভাৰতত কোভেক্সিন নামৰ প্ৰতিষেধকবিধ দিল্লীস্থ সৰ্ব ভাৰতীয় আয়ুবিজ্ঞান প্ৰতিষ্ঠানসহ দেশৰ প্ৰথম শ্ৰেণীৰ ১৩ খন চিকিৎসালয়ত ক্লীনিকেল ট্ৰায়েল অৰ্থাৎ মানৱ দেহত পৰীক্ষণ আৰম্ভ হৈছে।
ইয়াৰ সমান্তৰালভাৱে চেৰাম ইষ্টিটিউট অৱ ইণ্ডিয়াই অক্সফোৰ্ড বিশ্ববিদ্যালয়ৰ সৈতে উদ্ভাৱন কৰা কোভিড ভেকিচন কোভিশ্বিল্ডও ভাৰতত ৫,০০০ লোকৰ মানৱ শৰীৰত তৃতীয় পৰ্যায়ৰ পৰীক্ষণ কৰাৰ লক্ষ্য নিৰ্ধাৰণ কৰা হৈছে।
তৃতীয় পৰ্যায়ৰ মানৱ শৰীৰৰ পৰীক্ষণ সফল হ’লেই এই ভেকচিনবিধক কোভিড১৯ ৰোগীৰ শৰীৰত কোভিড১৯ প্ৰতিষেধক হিচাপে প্ৰয়োগ কৰিব পৰা হ’ব।
এই সম্ভাৱনা দেখা দিয়াৰ লগে লগে ভাৰতক এটা সুখবৰ দিছে ভেকচিনবিধ নিৰ্মাণকাৰী প্ৰতিষ্ঠান চেৰাম ইষ্টিটিউট অৱ ইণ্ডিয়াই।
ভেকচিনবিধ কোভিড১৯ প্ৰতিষেধক হিচাপে কোভিড ৰোগীৰ শৰীৰত প্ৰয়োগৰ স্বীকৃতি লাভ কৰাৰ পিছতেই ইয়াক ভাৰতত বিনামূলীয়া কৰা হ’ব বুলি প্ৰতিষ্ঠানটোৱে জানিবলৈ দিছে।
ভাৰতত ১০০০ টকাৰ মূল্য নিৰ্ধাৰণ কৰিবলগীয়া কোভিশ্বিল্ডক প্ৰথম পৰ্যায়ত ভাৰতক ৫০ কোটি পৰিমাণৰ ভেকচিন বিনামূলীয়াকৈ প্ৰদান কৰিব চেৰাম ইষ্টিটিউট অৱ ইণ্ডিয়াই।
ইফালে জানিব পৰা মতে এই ভেকচিনবিধ সফল হ’লে ভাৰতত জাতীয় টিকাকৰণৰ কৰা হ’ব। অৰ্থাৎ কেন্দ্ৰীয় চৰকাৰে এই ভেকচিনেৰে চৰকাৰী টিকাৰণৰ প্ৰকল্প আৰম্ভ কৰাৰ কথা।
অৱশ্যে চেৰাম ইষ্টিটিউট অৱ ইণ্ডিয়াৰ এই কোভিশ্বিল্ড প্ৰতিষেধকবিধ মানৱ শৰীৰত তৃতীয় পৰ্যায়ৰ পৰীক্ষণ আৰম্ভ কৰিলেও ইয়াক কোভিড প্ৰতিষেধক হিচাপে কাৰ্যকৰী কৰিবলৈ এতিয়াও আৰু কিছু মাহৰ প্ৰয়োজন হ’ব বুলি জানিব পৰা গৈছে।
