অভিনেত্ৰী বৰষা ৰাণী বিষয়া, সংগীত পৰিচালক তৰালি শৰ্মা আৰু অসমৰ কণ্ঠশিল্পী শংকুৰাজ কোঁৱৰ আৰু সন্দীপ খাউণ্ডে বাংগালোৰৰ বেংগলী এছোচিয়েশ্যন প্ৰেক্ষাগৃহত অহা ১১ মাৰ্চত অনুষ্ঠিত হ’বলগীয়া অসমীয়া চলচ্চিত্ৰ ‘তুমি আহিবানে’ৰ বিশেষ প্ৰদৰ্শনীত লাইভ প্ৰদৰ্শনৰ বাবে সাজু হৈছে।
পি আৰ এন্টাৰটেইন্টমেন্ট ইণ্ডিয়াই পৰিকল্পনা কৰা এই অনুষ্ঠানত বঁটাপ্ৰাপ্ত পৰিচালক প্ৰেৰণা বৰবৰুৱা, তৰালি শৰ্মা আৰু বৰষা ৰাণী বিষয়াৰ সৈতে এক অন্তৰংগ মুখামুখি তথা মত বিনিময়ৰ প্ৰদৰ্শনৰ আয়োজন কৰা হৈছে।
পি আৰ এন্টাৰটেইনমেন্ট হৈছে বাংগালোৰৰ এটা অনুষ্ঠান ব্যৱস্থাপনা তথা বিপণন কোম্পানী। ২০১৭ চনৰ পৰাই কোম্পানীটোৱে অসমৰ শ্ৰেষ্ঠ ছবিক প্ৰম’ট কৰাৰ এক পৰিকল্পনা হাতত লৈছে। এই ছবিসমূহত এক শক্তিশালী সামাজিক বাৰ্তা থকাৰ লগতে ই ‘তুমি আহিবানে’ৰ দৰে মুলসুঁতিৰ নিয়মীয়া ছবিৰ পৰা কিছু ভিন্ন হ’ব লাগিব।
কোম্পানীটোৱে এই চলচ্চিত্ৰসমূহ আৰু চলচ্চিত্ৰ লগত জড়িত ব্যক্তিক আমন্ত্ৰণ কৰি আনি বাংগালোৰত বাস কৰা অসমীয়া লোকৰ সৈতে মুখামুখি কৰাই দিয়াৰ প্ৰচেষ্টা চলাই আহিছে।
শংকুৰাজ কোঁৱৰ আৰু সন্দীপ খাউণ্ডৰ লগতে অসমৰ আন শিল্পীয়ে অনুষ্ঠানটোত লাইভ প্ৰদৰ্শন আগবঢ়াব।
‘তুমি আহিবানে’ৰ বিশেষ প্ৰদৰ্শনী অনুষ্ঠানটোত সহযোগিতা আগবঢ়াইছে জুবিন গাৰ্গ, ৰবি শৰ্মা আৰু বিভূতি ভূষণ হাজৰিকাই।
অনুষ্ঠানত বিশেষ নৃত্যৰ প্ৰদৰ্শন আগবঢ়াব বৰষা ৰাণী বিষয়াই।
তৰালি শৰ্মাইয়ো অনুষ্ঠানত গীতৰ শাই আগবঢ়াব।
