মন্ত্ৰী-বিধায়কক ক’ৰ’ণা ভাইৰাছে আক্ৰমণ কৰাৰ আশংকা তেনেই ক্ষীণ বুলি ভৱা এজন বিজেপি বিধায়কৰ দশাই এতিয়া বহুতকে আমোদ দিয়া পৰিলক্ষিত হৈছে।
ওড়িশাৰ চম্বলপুৰৰ বিজেপি বিধায়ক জয় নাৰায়ণ মিশ্ৰই আজি কোভিড প্ৰট’কল ভাঙি ক্ষমতাৰ জোৰ দেখুৱাবলৈ গৈ বাৰুকৈয়ে লটি-ঘটি হ’বলগীয়া হ’ল।
চম্বলপুৰৰ বিধায়ক গৰাকীয়ে আজি ৰেংগলী সমষ্টিৰ বিজেপি বিধায়ক নাউৰি নায়কৰ সৈতে শতাধিক সমৰ্থকক লগত লৈ চম্বলপুৰৰ জিলা কালেক্টৰৰ কাৰ্যালয়লৈ গৈছিল এখন স্মাৰক পত্ৰ দিবলৈ।
চম্বলপুৰত কোভিডৰ সংক্ৰমণ ৰোধ কৰাৰ দাবীৰে ওড়িশাৰ মুখ্যমন্ত্ৰী নবীন পাটনায়কলৈ স্মাৰক পত্ৰ প্ৰেৰণৰ বাবে যোৱা বিধায়ক জনে নিজেই সমদল কৰি গৈ কোভিড প্ৰটোকল ভঙাৰ কথাটো পিছে ঠিকেই তৎ ধৰিছিল আৰক্ষীয়ে।
আৰক্ষীয়ে বিধায়ক দুগৰাকীক ইমান বেছি সংখ্যক মানুহ লৈ কাৰ্যালয়ত প্ৰৱেশ কৰিব নোৱাৰিব বুলি কোৱাৰ পিছতে বিধায়ক মিশ্ৰই আৰক্ষীৰ সৈতে তৰ্কত লিপ্ত হয়।
তেওঁৰ সমৰ্থক একাংশই আনকি আৰক্ষীক আক্ৰমণো কৰে।
আৰক্ষীয়ে স্মাৰক পত্ৰখন উপ-কালেক্টৰ উমাকান্ত ৰাজৰ হাতত দিবলৈ কোৱাৰ পিছতে বিধায়ক জনে উপ-কালেক্টৰৰ সৈতেও তৰ্কত লিপ্ত হয়।
ইয়াৰ পিছতে আৰক্ষীয়ে বিধায়ক জয় নাৰায়ণ মিশ্ৰৰ বিৰুদ্ধে ভাৰতীয় দণ্ড বিধিৰ ১৪৩,১৮৮,৪৪৭,৩৩২,৩৫৩,২৯৪,২৬৯,২৭০,৩৩৬,৫০৬,১৪৯ ধাৰাত গোচৰ ৰুজু কৰে।
বিজেপি বিধায়ক জনক আৰক্ষীয়ে এনেদৰে আই পি চিৰ ধাৰাৰ মালা পিন্ধোৱাত চাঞ্চল্যৰ সৃষ্টি হৈছে।
