১৫ আগষ্ট বা তাৰ পাচৰ সপ্তাহতে মুকলি হ’ব ১০০ বিচনাযুক্ত বোকাখাতৰ শ্বহীদ কমলা মিৰি অসামৰিক চিকিৎসালয় ৷ কিন্তু তাৰ পূর্বে চিকিৎসালয়খন ক’ভিড কেয়াৰ চিকিৎসালয় হিচাপে ব্যৱহাৰ কৰা হ’ব ৷
ইতিমধ্যে আধুনিক সা-সুবিধাৰে চিকিৎসালয় খনৰ ৮০ শতাংশৰো অধিক কাম সম্পূৰ্ণ হৈ উঠিছে যদিও কাৰিকৰী বহু কাম বাকী আছে ৷
বৃহস্পতিবাৰে ৰাষ্ট্ৰীয় স্বাস্থ্য মিচনৰ সঞ্চালক জে ভি এন সুব্ৰমনিয়ামে পৰিদৰ্শন কৰে নিৰ্মাণৰত চিকিৎসালয় খন ৷
পৰিদৰ্শন কালত সঞ্চালক গৰাকীয়ে ১৫ আগষ্টৰ পূৰ্বে বোকাখাতৰ এশখন বিচনাযুক্ত চিকিৎসালয়ৰ ৰৈ যোৱা কামসমূহ গোলাঘাটৰ উপায়ুক্ত, বোকাখাতৰ মহকুমাধিপতি আৰু স্বাস্থ্য বিভাগৰ যুটীয়া সঞ্চালকক সম্পূৰ্ণ কৰিবলৈ নিৰ্দেশ দিয়ে।
বৰ্তমানলৈকে সম্পুৰ্ণ হোৱা চিকিৎসালয় খনৰ কামৰ অগ্ৰগতিত স্বাস্থ্য মিচনৰ সঞ্চালক গৰাকীয়ে সন্তোষ প্ৰকাশ কৰে ৷
ইয়াৰ পাছতে উপায়ুক্ত বিভাষ মোডীয়েও চিকিৎসালয় খন পৰিদর্শন কৰে ৷ ক’ভিড ১৯ৰ সংক্ৰমণৰ পটভুমিত নতুন ব্যৱস্থাপনাৰে বোকাখাতৰ এই নৱ নিৰ্মিত চিকিৎসালয়কো ব্যৱহাৰ কৰিব পাৰি নেকি তাৰ বাবেই উপায়ুক্ত বিভাষ মোডীৰ এই পৰিদৰ্শন বুলি জানিব পৰা গৈছে ৷
বোকাখাত মহকুমাত ক’ভিড ১৯ সংক্ৰমণৰ সংখ্যা বৃদ্ধি পাই থকাত বৃহস্পতিবাৰৰ পৰা কাৰ্যকৰী হোৱাকৈ বোকাখাত মহকুমাত আৰু দুখন ক’ভিড কেয়াৰ চিকিৎসালয় মুকলি কৰা হৈছে ৷
কহঁৰাত থকা জিলা গ্ৰামোন্নয়ন প্ৰাধিকৰণৰ অতিথিশালা আৰু পৰ্যটন বিভাগৰ বনশ্ৰী নামৰ অতিথিশালাক বৃহস্পতিবাৰৰ পৰা ক’ভিড কেয়াৰ চিকিৎসালয় হিচাবে মুকলি কৰা হৈছে ৷
বোকাখাতত ক’ভিড ১৯ ৰ গণ সংক্ৰমণৰ প্ৰতি লক্ষ্য ৰাখি উপায়ুক্তৰ পৰিদৰ্শনৰ পিচতে নৱ নিৰ্মিত এশ বিচনাযুক্ত শ্বহীদ কমলামিৰি অসামৰিক চিকিৎসালয় খনক দুশ খন বিচনাৰে ক’ভিড কেয়াৰ হাস্পতাল হিচাবে ব্যৱহাৰ কৰা হ’ব বুলিও প্ৰশাসনে জানিবলৈ দিছে ৷
পৰিদৰ্শন কালত চিকিৎসালয় খনৰ বৰ্তমানৰ পৰিস্থিতিৰ বুজ লয় উপায়ুক্ত গৰাকীয়ে ৷ ইফালে, চিকিৎসালয়খনত পর্যাপ্ত পৰিমাণৰ ঔষধ নথকাৰ অভিযোগ প্ৰসংগত সাংবাদিকে সোধা এক প্ৰশ্নৰ উত্তৰত চিকিৎসালয়খনত পৰ্যাপ্ত ঔষধ নথকা কথা স্বীকাৰ কৰে উপায়ুক্তই ৷
এই ক্ষেত্ৰত উপায়ুক্তই গোলাঘাটৰ স্বাস্থ্য বিভাগৰ যুটীয়া সঞ্চালকক ব্যৱস্থা গ্ৰহণৰ নিৰ্দেশ দিয়ে ৷
