আমেৰিকা যুক্তৰাষ্ট্ৰৰ সংহতি বিনষ্ট কৰি দেশখনক ৰাষ্ট্ৰপতি ডোনাল্ড ট্ৰাম্পে খণ্ড-বিখণ্ড কৰি তোলাৰ অভিযোগ আনিছে দেশখনৰ ৰাষ্ট্ৰপতি পদৰ ডেম’ক্ৰেট প্ৰাৰ্থী জো বিডেনৰ সহযোগী কমলা হেৰিছে।
বুধবাৰে কেলিফ’ৰ্ণিয়াত এখন সমাৱেশত চিনেটৰ হেৰিছে এইদৰে কয়।
কমলা হেৰিছে অভিযোগ কৰে যে ট্ৰাম্পে আমেৰিকাৰ লংগবৈষম্য তথা বৰ্ণবাদক উচটনি দি নাগৰিকসকলৰ মাজত সংহতি বিনষ্ট কৰিছে আৰু দেশখনত বিভাজিত কৰিছে।
যুক্তৰাষ্ট্ৰৰ বিকাশ তথা সংহতি অক্ষুন্ন ৰখাৰ বাবে ডেম’ক্ৰেট দলৰ বিকল্প নাই বুলিও কমলা হেৰিছে দাবী কৰে।
অহা ৩ নৱেম্বৰৰ নিৰ্বাচনত জো বিডেন যদি ৰাষ্ট্ৰপতি নিৰ্বাচিত হয় তেতিয়াহ’লে কমলা হেৰিছ তেওঁৰ উপ ৰাষ্ট্ৰপতি হিচাপে কাম কৰিব।
দৰাচলতে কমলা হেৰিছে নিজেই ৰাষ্ট্ৰপতি পদৰ প্ৰাৰ্থী হ’ব বিচাৰিছিল যদিও প্ৰতিযোগিতাৰ এটা পৰ্যায়ত গৈ তেওঁ ৰৈ যায়।
বিগত সময়ত ডোনাল্ড ট্ৰাম্প প্ৰশাসনৰ বিৰুদ্ধে হেৰিছে শক্তিশালী স্থিতি গ্ৰহণ কৰি আহিছে। ইপিনে, মঙলবাৰে ৰাষ্ট্ৰপতি পদৰ ডেম’ক্ৰেট প্ৰাৰ্থী জো বিডেনে তেওঁৰ ৰাণিং মেট হিচাপে কমলা হেৰিছক নিৰ্বাচিত কৰে।
আমেৰিকা যুক্তৰাষ্ট্ৰৰ দ্বিতীয় সৰ্বোচ্চ পদত প্ৰতিদ্বন্দ্বিতাৰ বাবে নিৰ্বাচিত হোৱা কমলা হেৰিছ হৈছে প্ৰথমগৰাকী কৃষ্ণাংগ তথা ভাৰতীয় বংশোদ্ভৱ আমেৰিকান মহিলা।
কমলা হেৰিছক এই পদৰ বাবে নিৰ্বাচিত কৰা বাবে ডেম’ক্ৰেট নেতাসকলে জো বিডেনক প্ৰশংসা কৰিছে।
