ইয়াতকৈ মানৱতাক ভূলুণ্ঠিত কৰিব পৰা ঘটনা আৰু কি হ’ব পাৰে। উত্তৰ-প্ৰদেশৰ লখিমপুৰ খিৰি সংঘটিত হৈছে এক নৃশংস, বৰ্বৰ ঘটনা।
এগৰাকী ১৩ বছৰীয়া দলিত নাবালিকাক দুজন বৰ্বৰ যুৱকে ধৰ্ষণ কৰাই নহয়, লগতে তেওঁৰ চকু কাঢ়ি, জিভা কাটি দিয়াৰ পাছত ডিঙিত ফাঁচ লগাই খেতিপথাৰত পেলাই থৈ যায়।
ইছানগৰ থানাৰ অন্তৰ্গত অঞ্চলত বাস কৰা নাবালিকাগৰাকী শুকুৰবাৰে আবেলি যি ঘৰৰপৰা ওলাই গৈছিল, তাৰ পাছত আৰু উভতি নাহিল।
পৰিয়ালৰ লোকে বহু দেৰিলৈকে ঘৰলৈ উভতি নহাত নাবালিকাগৰাকীক সন্ধান কৰে। পাছত নাবালিকাগৰাকী বিচাৰি নোপোৱাত আৰক্ষীক খৱৰ দিয়ে।
অৱশেষত কুঁহিয়াৰ খেতিৰ মাজত শনিবাৰে নাবালিকাগৰাকীৰ মৃতদেহ উদ্ধাৰ হয়।
আৰক্ষীয়ে ঘটনাস্থলীৰ পৰা মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। মৰণোত্তৰ পৰীক্ষাত দলবদ্ধ ধৰ্ষণৰ কথা পোহৰলৈ আহিছে।
আৰক্ষীয়ে হত্যাৰ অভিযোগত দুজন লোকক গ্ৰেপ্তাৰ কৰিছে।
ঘটনা অনুসৰি, লখিমপুৰ খিৰিৰ ইছানগৰ থানাৰ অধীনৰ পকৰিয়া গাঁৱৰ ১৩ বছৰীয়া নাবালিকাগৰাকীয়ে ঘৰৰ পৰা শৌচ কৰিবলৈ খেতি পথাৰলৈ গৈছিল।
তেতিয়াই গাঁৱৰে দুজন যুৱকে নাবালিকাগৰাকীক ধৰ্ষণ কৰি হত্যা কৰে। হত্যা কৰাৰ পূৰ্বে নাবালিকাগৰাকীৰ চকু কঢ়াৰ লগতে জিভা কাটি দিয়া হয় আৰু ডিঙিত ফাঁচ লগাই পাছত খেতিপথাৰত পেলাই থৈ যায়।
পৰিয়ালৰ লোকে গাঁৱৰে যুৱক সন্তোষ যাদব আৰু সঞ্জয় গৌতমৰ বিৰুদ্ধে ছোৱালীজনীক ধৰ্ষণ আৰু হত্যা কৰাৰ অভিযোগ দিয়ে।
আৰক্ষীয়ে পৰিয়ালৰৰ লোকৰ ভাষ্য আৰু ঘটনাক্ৰমৰ আধাৰত যুৱক দুজনক গ্ৰেপ্তাৰ কৰাৰ লগতে তেওঁলোকৰ বিৰুদ্ধে গোচৰ ৰুজু কৰিছে।
