হৃষিকেশৰ ওলোমা দলঙত নগ্ন ভিডিঅ’ কৰি আৰক্ষীৰ হাতত গ্ৰপ্তাৰ হ’বলগীয়া হ’ল এগৰাকী ফৰাচী যুৱতী।
ঘটনাৰ বিৱৰণীৰ মতে গঙ্গাৰ ওপৰত অৱস্থিত হৃষিকেশৰ বিখ্যাত লক্ষ্মণ ওলোমা দলঙত এগৰাকী ২৭ বছৰীয়া ফৰাচী যুৱতীয়ে নগ্ন হৈ প্ৰকাশ্যে ভিডিঅ’ শ্বুটিং কৰি চ’ছিয়েল মিডিয়াত ভাইৰেল কৰিছিল।
ইয়াৰ পিছতে উক্ত ভিডিঅ’টো প্ৰত্যক্ষ কৰি গজেন্দ্ৰ সজ্জন নামৰ এজন ব্যক্তিয়ে উক্ত ফৰাচী যুৱতী গৰাকীৰ বিৰুদ্ধে স্থানীয় আৰক্ষী থানাত অভিযোগ দাখিল কৰে।
উক্ত অভিযোগৰ ভিত্তিতে আৰক্ষীয়ে তদন্ত আৰম্ভ কৰি ফৰাচী যুৱতী গৰাকীৰ অনুসন্ধানত অভিযান আৰম্ভ কৰে।
আৰক্ষীয়ে অভিযান চলাই হৃষিকেশৰ এখন হোটেলৰ পৰা ফৰাচী যুৱতী গৰাকীক আটক কৰে। আৰক্ষীৰ মতে ফৰাচী যুৱতী গৰাকীয়ে বিগত পাঁচ মাহ ধৰি হৃষিকেশতে আছে।
যুৱতী গৰাকীয়ে আৰক্ষীৰ আগত উক্ত ভিডিঅ’টো শ্বুটিং কৰি চ’ছিয়েল মিডিয়াত আপলোড কৰাৰ কথা স্বীকাৰ কৰিছে।
আৰক্ষীৰ জেৰাত যুৱতী গৰাকীয়ে ভাৰতত এই ধৰণে নগ্ন হৈ প্ৰকাশ্যে ভিডিঅ’ শ্বুটিং কৰাটো যে নিষিদ্ধ সেই বিষয়ে অৱগত নহয় আৰু এয়া অনিচ্ছাকৃত ভুল বুলি স্বীকাৰ কৰিছে।
নিজৰ অলংকাৰৰ ব্যৱসায়ৰ বাবে উক্ত ভিডিঅ’টো শ্বটিং কৰা হৈছিল বুলিও আৰক্ষীৰ আগত যুৱতী গৰাকীয়ে প্ৰকাশ কৰিছে।
অজ্ঞতাবশতঃ উক্ত ভিডিঅ’টো শ্বুটিং কৰা বুলি স্বীকাৰ কৰাৰ পিছত আৰক্ষীয়ে ফৰাচী যুৱতী গৰাকীক জামিনত মুকলি কৰি দিয়ে।
স্থানীয় আৰক্ষী থানাৰ বিষয়াগৰাকীয়ে সংবাদ মাধ্যমক কয় যে গজেন্দ্ৰ সজ্জনৰ অভিযোগৰ ভিত্তিত বিদেশী যুৱতী গৰাকীক গ্ৰেপ্তাৰ কৰা হৈছিল যদিও তেওঁ অজ্ঞতাবশতঃ এই ভিডিঅ’টো কৰা বুলি ভুল স্বীকাৰ কৰাৰ পিছত জামিনত মুকলি কৰি দিয়া হৈছে।
