‘গাত হালধীয়া কাপোৰ লৈ মানসিক বিকৃতি ঘটা সত্যৰঞ্জন বৰাক অনতিপলমে গ্ৰেপ্তাৰ কৰক।‘ এই দাবী তুলিছে দুৰ্নীতি বিৰোধী যুৱ শক্তি, অসমৰ সভাপতি ধৰ্মকান্ত গগৈয়ে।
নৰ্থ ইষ্ট নাওলৈ প্ৰেৰণ কৰা এক ভিডিঅ’যোগে গগৈয়ে কয় ‘ৰাজ্যত কিছু মাহৰ পৰা এখন হালধীয়া কাপোৰ লৈ এটা অতি স্বাৰ্থপৰ আৰু সুবিধাবাদী সত্য ৰঞ্জন বৰাই নিজকে হিন্দু ধৰ্মৰ ৰক্ষক বুলি ভাবিবলৈ লৈছে।’
এইজন নেতাই হিন্দু মুছলমানৰ মাজত বিভেদ সৃষ্টি কৰিবলৈ বা গোষ্ঠীগত সংঘৰ্ষ কৰিবলৈ নাভুত-নাশ্ৰুত অকথ্য বক্তব্য ছ’চিয়েল মেডিয়াৰ জৰিয়তে আপলোড কৰিছে অথবা সংবাদ মাধ্যমৰ জৰিয়তে প্ৰকাশ কৰিবলৈ চেষ্টা কৰিছে।‘
‘আইন ব্যৱস্থাৰ বাবে ই অতি লজ্জাজনক। শিলাদিত্য দেৱকে ধৰি বিভিন্ন ধৰণৰ নেতাই নিজৰ টিআৰপি ল’বলৈ মুছলমানক গালি পাৰি বৰ্তমানৰ বিজেপি চৰকাৰ আৰু আৰএছএছৰ আস্থাভাজন হ’বলৈ চেষ্টা কৰিছে।‘ গগৈয়ে লগতে কয়।
ইপিনে, এইসকলৰ বিৰুদ্ধে চৰকাৰ প্ৰশাসনে কোনোধৰণৰ ব্যৱস্থা গ্ৰহণ কৰা পৰিলক্ষিত হোৱা নাই বুলি অভিযোগ কৰি গগৈয়ে লগতে কয় ‘হালধীয়া কাপোৰ এখন লৈ নিজকে ধৰ্মীয় গুৰু বুলি ভাবিবলৈ ধৰা পিপঁৰা সত্যৰঞ্জন বৰাৰ বিৰুদ্ধে অনতিপলমে ৰাজ্য চৰকাৰে ব্যৱস্থা গ্ৰহণ কৰিব লাগে।‘
আৰক্ষী সঞ্চালক প্ৰধান ভাস্কৰজ্যোতি মহন্তলৈ অনুৰোধ জনাই গগৈয়ে কয় ‘অনতি পলমে সত্যৰঞ্জন বৰাৰ দৰে দুষ্ট চৰিত্ৰৰ লোকৰ বিৰুদ্ধে ব্যৱস্থা গ্ৰহণ কৰিব লাগে।‘
ইয়াৰোপৰি, উজনি অসমৰ বিভিন্ন থানাত সত্যৰঞ্জন বৰাৰ বিৰুদ্ধে গোচৰ পঞ্জীয়ন কৰা হৈছে যদিও কোনোধৰণৰ ব্যৱস্থা গ্ৰহণ কৰা নাই বুলি উল্লেখ কৰি গগৈয়ে কয় ‘সত্য ৰঞ্জন বৰাৰ দৰে দুষ্ট চৰিত্ৰৰ লোকক গ্ৰেপ্তাৰ নকৰি অসম আৰক্ষীয়ে পক্ষপাতিত্ব গ্ৰহণ কৰিছে।’
