বাংলাদেশৰ ৰাজধানী নগৰ ঢাকাৰ উপকণ্ঠ অঞ্চলৰ এটা জামে মছজিদ সংঘটিত ৬ টাকৈ এচিৰ ভয়াৱহ বিস্ফোৰণত শিশুসহ ১১ জন লোকৰ মৃত্যু হৈছে।
অগ্নিদ্বগ্ধ হৈছে বহু লোক।
সংবাদ মাধ্যমৰ খবৰ অনুসৰি দেশখনৰ ৰাজধানী চহৰৰ উপকণ্ঠ অঞ্চল নাৰায়ণগঞ্জৰ ফতুল্লাৰ জামে মছজিদত এই ভয়াৱহ বিস্ফোৰণ সংঘটিত হয়।
প্ৰত্যক্ষদৰ্শীৰ মতে শনিবাৰে নাৰায়ণগঞ্জৰ সদৰ উপজিলাৰ ফতুল্লা তানাৰ অন্তৰ্গত বাইতুল ছালাহ জামে মছজিদত নামাজৰ সময়তে হঠাৎ এক বিকৎ শব্দ কৰি এটা বৈদ্যুতিক ট্ৰেঞ্চফৰ্মাৰৰ বিস্ফোৰণ ঘটে।
উক্ত বিস্ফোৰণৰ লগে লগে মছজিদত থকা ৬ টাকৈ এচি বিস্ফোৰণ ঘটি তৎক্ষণাতে সমগ্ৰ মছজিদটো জুইয়ে আগুৰি ধৰে।
এচি বিস্ফোৰণৰ ফলত সৃষ্ট অগ্নিত দ্বগ্ধ হৈ মছজিদৰ নামাজত অংশগ্ৰহণ কৰি থকা শিশুসহ ১১ জন লোকৰ মৃত্যু ঘটিছে আৰু বহু লোক অগ্নিদ্বগ্ধ হৈ গুৰুতৰ ভাৱে আহত হৈছে।
ঢাকাৰ শ্বেখ হাছিনা জাতীয় বাৰ্ণ এণ্ড প্লাষ্টিক চাৰ্জাৰি ইনষ্টিটিউটত ৩৮ গৰাকী অগ্নিদ্বগ্ধ লোকক ভৰ্তি কৰোৱা হৈছে।
চিকিৎসালয়ৰ সূত্ৰ মতে ভৰ্তি কৰোৱা অগ্নিদ্বগ্ধ সকলো লোকৰে অৱস্থা অতি সংকটজনক।
চিকিৎসাধীনসকলক উপযুক্ত চিকিৎসা প্ৰদানৰ বাবে দেশখনৰ প্ৰধানমন্ত্ৰী শ্বেখ হাছিনাই নিৰ্দেশ দিছে।
“বাৰ্ণ ইউনিটত ভৰ্তি কৰোৱাসকলৰ সকলোৰে শ্বাস নলী ক্ষতিগ্ৰস্ত হৈছে। অগ্নিদ্বগ্ধ অধিকসংখ্যকে আইচিইউলৈ প্ৰেৰণ কৰা হৈছে। সকলোৰে অৱস্থা ভাল নহয়।” চাৰ্জাৰি ইনষ্টিটিউটৰ চিকিৎসক ডাঃ সামন্ত লাল সেনে সংবাদ মাধ্যমৰ আগত কয়।
