কৰ’না অতিমাৰীৰ ফলত চীনে যি ক্ষতিৰ সন্মুখীন হৈছে তাতকৈয়ো অধিক ক্ষতিৰ সম্ভাৱনা দেখা গৈছে।
বাতৰি অনুসৰি, সীমান্তৰ আগ্ৰাসনৰ লগতে দক্ষিণ চীন সাগৰত আধিপত্যৰ ফলত বিশ্বৰ কেইবাখনো দেশৰ ৰোষত পৰিছে চীন।
ইয়াৰ পৰিনাম দেশখনে বৃহৎ ক্ষতিৰে ভৰিব লগীয়া হ’ব পাৰে বুলি আশংকা প্ৰকাশ কৰিছে পৰ্যবেক্ষক মহলে।
অষ্ট্ৰেলিয়াৰ উৎপাদিত সামগ্ৰীৰ এক তৃতীয়াংশ চীনলৈ ৰপ্তানি হয়। কৃষিজাত সামগ্ৰীয়েই হওক বা কাৰাখানত উৎপাদিত সামগ্ৰীয়েই হওক চীনে অষ্ট্ৰেলিয়াৰ পণ্য সামগ্ৰীৰ এক বৃহৎ ক্ৰেতা।
সম্প্ৰতি অষ্ট্ৰেলিয়া সমস্যাত পৰিছে। ইয়াৰ উপাদিত সামগ্ৰীৰ আন্তৰ্জাতিক পৰিস্থিতিৰ বাবে যদি ৰপ্তানি হোৱাটো বন্ধ হৈ পৰে তেতিয়া অষ্ট্ৰেলিয়া বৃহৎ আৰ্থিক ক্ষতিৰ সন্মুখীন হ’ব।
সেইদৰে বৃহৎ খাদ্য সংকটৰ সন্মুখীন হৈ পৰিব চীন। ইতিমধ্যে, পূৰ্বৰ সকলো অভিলেখ ভংগ কৰি এইবাৰ বানত বিধ্বস্ত হৈ পৰিছে চীন। এতিয়াও ইয়াৰ প্ৰকোপৰ পৰা ৰক্ষা পৰা নাই দেশখন।
বাতৰি অনুসৰি, চীনৰ প্ৰায় ৬কোটি লোক বানত আক্ৰান্ত হৈছে। প্ৰায় ডেৰ কোটি একৰ ভূমিৰ শস্য বিনষ্ট হৈ পৰিছে।
আনহাতে, কেবল শস্য বিনষ্ট হোৱাই নহয়, আগষ্ট মাহলৈকে পানী জমা হৈ থকাৰ বাবে নতুন কৃষিও সম্ভৱ হোৱা নাই দেশখনত। গতিকেই দেশীয়ভাৱে উৎপাদিত খাদ্য শস্যৰ নাটনি স্পষ্ট হৈ পৰিছে।
চীনৰ বাবে আটাইতকৈ উদ্বিগ্নতাৰ বিষয়টো হৈছে দেশখনে আটাইতকৈ বেছি খাদ্য শস্য ক্ৰয় কৰা আমেৰিকা, অষ্ট্ৰেলিয়া, কানাডা আৰু জাপানৰ দৰে দেশৰ সৈতে বিগত কেইমাহ ধৰি দেশখনৰ সম্পৰ্কত ঘূণে ধৰিছে।
দেখা গৈছে যে যদি আমেৰিকাই চীনলৈ খাদ্য শস্য ৰপ্তানি হ্ৰাস কৰে বা শুল্ক বৃদ্ধি কৰে তেতিয়া চীনৰ বাবে সমস্যা অধিক গভীৰ হৈ পৰিব।
এনেক্ষেত্ৰত অষ্ট্ৰেলিয়াৰ সৈতে চীনে আপোচ সূত্ৰত বান্ধ খোৱাৰ বিকল্প নাথাকিব।
অৱশ্যে, এই মুহূৰ্তত চীনে নাও বুৰিলেও টিঙৰ পৰা ননমাৰ স্থিতিত অটল আছে।
