ওড়িশাৰ সম্বলপুৰত পুনৰ সংঘটিত হৈছে এটা লজ্জাজনক দলবদ্ধ ধৰ্ষণৰ ঘটনা। জুজুমুৰা থানাৰ অন্তৰ্গত এলেকাত এগৰাকী নাবালিকাক পাঁচজন যুৱকে অপহৰণ কৰি নিৰ্জন স্থানত দলবদ্ধ ধৰ্ষণ কৰাৰ অভিযোগ উত্থাপন হৈছে। ঘটনাৰ পিছত আৰক্ষীয়ে তিনিজন অভিযুক্তক গ্ৰেপ্তাৰ কৰিছে, আনহাতে বাকী দুজন এতিয়াও পলাতক।
পৰিয়ালৰ সূত্ৰৰ পৰা জানিব পৰা মতে, দেওবাৰে সন্ধিয়া নাবালিকাগৰাকী নিজৰ কামৰ বাবে ঘৰৰ পৰা ওলাই গৈছিল। সেই সময়ত অভিযুক্তসকলে তাইক তুলি নি নিৰ্জন স্থানলৈ লৈ যায় আৰু ধৰ্ষণ কৰে। ঘৰলৈ উভতি অহাৰ পিছত নাবালিকাগৰাকীয়ে পৰিয়ালৰ সদস্যৰ আগত অত্যাচাৰৰ কথা প্ৰকাশ কৰে। পৰিয়ালে জুজুমুৰা থানাত এজাহাৰ দাখিল কৰাৰ পিছত আৰক্ষীয়ে তৎক্ষণাত তদন্ত আৰম্ভ কৰে আৰু তিনিজন অভিযুক্তক গ্ৰেপ্তাৰ কৰে। সম্বলপুৰৰ আৰক্ষী অধীক্ষক মুকেশ কুমাৰ ভামুৱে কয়, “ঘটনাটো দেওবাৰে সন্ধিয়া প্ৰায় ৬:৩০ বজাত সংঘটিত হৈছিল। তিনিজন অভিযুক্তক গ্ৰেপ্তাৰ কৰা হৈছে আৰু তেওঁলোকে অপৰাধৰ কথা স্বীকাৰ কৰিছে। বাকী দুজনকো শীঘ্ৰে গ্ৰেপ্তাৰ কৰা হ’ব। গ্ৰেপ্তাৰ হোৱা তিনিজন একেটা কলনীৰ বাসিন্দা, আনহাতে পলাতক দুজন ওচৰৰ কলনীৰ।”
এই ঘটনাই ওড়িশাত মহিলা আৰু শিশুৰ সুৰক্ষাৰ ওপৰত প্ৰশ্ন উত্থাপন কৰিছে। শেহতীয়াকৈ বালাছৌৰত এগৰাকী কলেজীয়া ছাত্ৰীয়ে এগৰাকী অধ্যাপকৰ বিৰুদ্ধে যৌন নিৰ্যাতনৰ অভিযোগ উত্থাপন কৰাৰ পিছত আৰক্ষীৰ নিষ্ক্ৰিয়তাৰ হতাশাত আত্মহত্যা কৰিছিল। ইয়াৰ উপৰি ময়ুৰভঞ্জত এগৰাকী নাবালিকাক অপহৰণৰ পিছত ধৰ্ষণৰ চেষ্টা কৰিছিল আৰু আংগুল জিলাত এগৰাকী জনজাতীয় মহিলাৰ দলবদ্ধ ধৰ্ষণৰ অভিযোগ পোহৰলৈ আহিছিল। সঘনে সংঘটিত হ’বলৈ ধৰা এনে ঘটনাই ৰাজ্যখনৰ আইন-শৃংখলাৰ পৰিস্থিতিকলৈ প্ৰশ্ন উত্থাপন কৰিছে।
