ৰামচন্দ্ৰৰ জন্মভূমি অযোধ্যাত নিৰ্মাণ হ’ব এটা বিশ্বমানৰ বিমান বন্দৰ।
আন্তঃৰাষ্ট্ৰীয় মানৰ সকলো সুবিধা উপলব্ধ হ’বলগীয়া এই বিমান বন্দৰটোৰ নামকৰণ কৰা হ’ব ৰামৰ নামেৰেই।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই কথা প্ৰকাশ কৰিছে।
আদিত্যনাথে প্ৰকাশ কৰা মতে অযোধ্যাত ৰাম মন্দিৰৰ নিৰ্মাণ সম্পূৰ্ণ হোৱাৰ পিছতে সেই স্থানলৈ দেশ-বিদেশৰ লাখ লাখ পৰ্যটকৰ সোঁত বব।
পৰ্যটক সকলৰ সুবিধাৰ্থেই অযোধ্যাত এটা বিশ্ব মানৰ বিমান বন্দৰ নিৰ্মাণৰ সিদ্ধান্ত লোৱা হৈছে।
ইতিমধ্যে বিমান বন্দৰ নিৰ্মাণৰ বাবে প্ৰয়োজনীয় মাটি অধিগ্ৰহণ কৰা হৈছে।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে প্ৰকাশ কৰা মতে ২০২১ চনৰ ডিচেম্বৰ মাহৰ ভিতৰত ৰামচন্দ্ৰৰ নামেৰে নামকৰণ কৰিবলগীয়া বিমান বন্দৰটোৰ নিৰ্মাণ কাৰ্য সম্পূৰ্ণ হৈ উঠিব।
উত্তৰ প্ৰদেশৰ অসামৰিক বিমান পৰিবহণ দপ্তৰৰ মন্ত্ৰী নন্দ গোপাল নন্দীয়ে সাংবাদিকৰ আগত প্ৰকাশ কৰা মতে বিমান বন্দৰৰ নিৰ্মাণৰ বাবে ইতিমধ্যে আদিত্যনাথৰ চৰকাৰে ৫২৫ কোটি টকা মোকলাই দিছে।
ইয়াৰে ৩০০ কোটি টকা ইতিমধ্যে খৰচ কৰা হৈছে বুলি মন্ত্ৰী গৰাকীয়ে প্ৰকাশ কৰে।
উল্লেখ্য ১৭ ছেপ্তেম্বৰৰ পিছত অয্যোধ্যাত ৰাম মন্দিৰৰ নিৰ্মাণ কাৰ্য আৰম্ভ কৰা হ’ব আৰু তিনি বছৰৰ ভিতৰতে মন্দিৰৰ নিৰ্মাণৰ কাম সম্পূৰ্ণ হৈ উঠিব বুলি আশা কৰা হৈছে।
