ৰাজ্যখনৰ জনসংযোগ বিভাগত সংঘটিত ৩৫কোটি টকীয়া ভিজন অসম, মিছন অসম কেলেংকাৰি সন্দৰ্ভত মুখ্য মন্ত্ৰীৰ বিশেষ ভিজিলেন্স শাখাই বৃহস্পতিবাৰে অভিযোগনামা দাখিল কৰে।
পোন্ধৰ বছৰীয়া কংগ্ৰেছৰ শাসনৰ অন্তিমটো কাৰ্যকালৰ শেষ পৰ্যায়ত জনসংযোগ বিভাগত এই কেলেংকাৰি সংঘটিত হৈছিল।
ভিজিলেন্সে দাখিল কৰা ১১৫পৃষ্ঠাজোৰা অভিযোগনামাত পাঁচজন ব্যক্তিক অভিযুক্ত কৰা হৈছে।
ভিজিলেন্সে অভিযুক্ত কৰা ব্যক্তিকেইজনৰ ভিতৰত আছে জনসংযোগ বিভাগৰ প্ৰাক্তন সঞ্চালক ৰঞ্জিত গগৈ, ব্ৰহ্মপুত্ৰ টেলিভিশ্যনৰ ৰাজীৱ বৰা আৰু অঞ্জনা বৰা, ডেল্টা পাব্লিছিটিৰ দিলীপ কলিতা আৰু প্ৰদীপ এডৰ্ভাটাইজিঙৰ অপূৰ্ব লহকৰ।
গোচৰটোত জনসংযোগৰ প্ৰাক্তন সঞ্চালক ৰঞ্জিত গগৈক মুখ্য অভিযুক্ত কৰা হৈছে।
উল্লেখ্য যে এই ভিজন অসম, মিছন অসম আঁচনিখনৰ জৰিয়তে তৰুণ গগৈ চৰকাৰৰ বিভিন্ন আঁচনিসমূহৰ প্ৰচাৰ তথা ইলেকট্ৰনিক মাধ্যমৰ জৰিয়তে বিজ্ঞাপন প্ৰচাৰৰ কাৰ্যসূচী গ্ৰহণ কৰা হৈছিল।
আঁচনিখনৰ বাবে মুঠতে ৩৪.২ কোটি টকা ধাৰ্য কৰা হৈছিল।
দিচপুৰৰ বিধায়ক অতুল বৰাৰ অভিযোগৰ ভিত্তিত মুখ্য মন্ত্ৰীৰ বিশেষ ভিজিলেন্স শাখাই এই কেলেংকাৰিৰ তদন্ত আৰম্ভ কৰিছিল।
