কোভিড চেন্টাৰত এগৰাকী ২৭ বছৰীয়া যুৱকৰ বিকৃত যৌন কামনাৰ বলি হৈছে এগৰাকী ২০ বছৰীয়া যুৱতী।
ঘটনাটো সংঘটিত হৈছিল মহাৰাষ্ট্ৰৰ থানে জিলাৰ এটা কোভিড চেন্টাৰত।
আৰক্ষী সূত্ৰই জনোৱা অনুসৰি এই ধৰ্ষণ কাণ্ডটো যেৱা জুন মাহতে সংঘটিত হৈছিল যদিও শনিবাৰেহে পোহৰলৈ আহিছে।
“শনিবাৰে ২০ বছৰীয়া যুৱতী গৰাকীয়ে নৱগড় আৰক্ষী থানাত অভিযোগ দাখিল কৰাৰ পিছতহে ঘটনাটো পোহৰলৈ আহিছে।” আৰক্ষী থানাৰ পৰিদৰ্শক চম্পট পাটিলে কয়।
ঘটনাৰ বিৱৰণীৰ মতে মীৰা ৰোড অঞ্চলত থকা এটা কোভিড চেন্টাৰত ধৰ্ষিতা মহিলাগৰাকী কোভিড আক্ৰান্ত ১১ বছৰীয়া এগৰাকী আত্মীয়ক আলপৈচান ধৰিবলৈ নিজৰ ১০ মহীয়া কন্যা সন্তানৰ সৈতে এটা কোঠাত বাহৰ পাতি আছিল।
অভিযুক্তই ৰাতি গৰম পানী বিচৰা চলেৰে মহিলাগৰাকীৰ কোঠাত প্ৰৱেশ কৰি ধৰ্ষণ কৰে ১০ মহীয়া সন্তানৰ মাতৃ গৰাকীক।
অভিযুক্তই ধৰ্ষণ কাণ্ড সংঘটিত কৰাৰ পিছতে ঘটনাটোৰ বিষয়ে মুখ খুলিলে মহিলাগৰাকীৰ সন্তানটিৰ লগতে পৰিয়ালৰ অন্য সদস্যক হত্যা কৰাৰ ভাবুকি প্ৰদান কৰে।
আৰক্ষীৰ মতে মহিলা গৰাকীয়ে ১০ মহীয়া কন্যা সন্তানটি আৰু পৰিয়ালৰ অন্য সদস্যৰ প্ৰাণৰ হেৰুওৱাৰ ভয়ত সমস্ত ঘটনাটো ইমান দিনে গোপনে ৰাখিছিল যদিও শনিবাৰে নৱগড় আৰক্ষী থানাত এক অভিযোগ দাখিল কৰে।
আৰক্ষীয়ে উক্ত অভিযোগৰ ভিত্তিত ভাৰতীয় দণ্ডবিধি আইনৰ ধাৰা ৩৭৬(ধৰ্ষণ) অধীনত গোচৰ ৰুজু কৰি অভিযুক্ত লোকজনক আজি গ্ৰেপ্তাৰ কৰিছে।
