কৃষক নেতা অখিল গগৈৰ মুক্তিৰ বাবে আইনী যুজঁ কৰিবলৈ অসমৰ বিভিন্ন ঠাইৰ লগতে নগাঁও জিলা কৃষক মুক্তি সংগ্ৰাম সমিতিয়ে নগাঁৱৰ বিভিন্ন ঠাই পুঁজি সংগ্ৰহ কৰি আহিছে।
সংগঠনটোৰ নগাঁও জিলা সমিতিৰ সদস্যসকলে আজি কলিয়াবৰৰ জখলাবন্ধা হাটবৰ মিছাকে ধৰি কলিয়াবৰৰ বিভিন্ন অঞ্চলত অৰ্থ সংগ্ৰহ কৰে।
উল্লেখযোগ্য যে যোৱা ১৩ আগষ্ট ২০২০ তাৰিখে কৃষক মুক্তি সংগ্ৰাম সমিতিয়ে অসমৰ বিভিন্ন অঞ্চলত অৰ্থ সংগ্ৰহৰ প্ৰস্তাৱ গ্ৰহণ কৰাৰ পাছতে ২৫ আগষ্ট ২০২০ তাৰিখৰ পৰা অৰ্থ সংগ্ৰহ কাৰ্যসূচী গ্ৰহণ কৰিছিল।
কৃষক নেতাজনৰ প্ৰতি অসমৰ ৰাইজে দেখুৱা মৰমৰ শলাগ লৈ কৃষক মুক্তি সংগ্ৰাম সমিতিৰ নগাঁও জিলা সমিতিৰ সম্পাদকে কয় যে সৰ্বানন্দ সোণোৱাল চৰকাৰে টোলগেটকে আদি কৰি ৰাইজৰ জ্বলন্ত সমস্যাৰ ওপৰত অসমীয়া ৰাইজৰ হকে মাত মাতি থকা অখিল গগৈক ভুৱা গোচৰত বাৰে বাৰে কাৰাগাৰলৈ পঠিয়াই থকা প্ৰত্যুত্তৰ ২০২১ৰ নিৰ্বাচনত অসমবাসী ৰাইজে দিব।
আনহাতে কৰ’ণা মহামাৰীৰ ফলত বেপাৰ বাণিজ্যকে ধৰি ব্যৱসায় তথা অৰ্থ অহা পথবোৰ বন্ধ হৈ থকা সময়তো কৃষক নেতাজনৰ মুক্তিৰ বাবে ৰাইজে নিজৰ সামৰ্থ অনুযায়ী মুক্ত হস্তে অৰ্থ দান কৰা পৰিলক্ষিত হৈছে।
এই দুৰ্গত দিনতো ৰাইজে কৃষক নেতাগৰাকীৰ আইনী সাহায্যৰ বাবে মুক্তহস্তে দান বৰঙণি আগবঢ়োৱাৰ বাবে ধন্যবাদ জ্ঞাপন কৰিছে।
