মহামাৰী ক’ৰ’নাৰ মহাসংহাৰ চলি থকাৰ সময়তে আজিৰ পৰা আৰম্ভ হৈছে সংসদৰ উভয় সদনৰ বৰ্ষাকালীন অধিৱেশন।
অধিৱেশনৰ প্ৰথম দিনটোতে বিত্ত মন্ত্ৰ্যালয়ে সংসদত জানিবলৈ দি কয় যে ২০১৫ চনৰ ১ জানুৱাৰিৰ পৰা ২০১৯ চনৰ ৩১ জানুৱাৰিৰ ভিতৰত বিজয় মালিয়া, নীৰৱ মোদী আৰু মোহুল চৌকছিৰ দৰে ৩৮ গৰাকী ব্যৱসায়ীয়ে দেশ এৰি পলাইছে।
এই ৩৮ গৰাকী লোকৰ বিৰুদ্ধে বিত্তীয় কেলেংকাৰিৰ অভিযোগ আছে আৰু বিষয়টো চি বি আইয়ে তদন্ত চলাই আছে।
বিত্তীয় খেলিমেলি তথা বেংকৰ পৰা লোন লৈ ভাৰত ত্যাগ কৰা ব্যৱসায়ীৰ তথ্য সন্দৰ্ভত জানিব বিচৰাত বিত্ত মন্ত্ৰ্যালয়ে লিখিত উত্তৰত এই কথা জানিব দিয়ে।
ৰাজ্যিক বিত্ত মন্ত্ৰী অনুৰাগ ঠাকুৰে লিখিত উত্তৰত জানিবলৈ দি কয় যে ভাৰত ত্যাগ কৰা এই লোকসকলৰ বিৰুদ্ধে নিৰ্ধাৰিত আইনৰ জৰিয়তে ব্যৱস্থা গ্ৰহণ কৰা হ’ব।
জানিব পৰা মতে, হীৰা ব্যৱসায়ী নীৰৱ মোদীৰ প্ৰত্যাৱৰ্তন সন্দৰ্ভত শুনানী অহা ৩ নৱেম্বৰলৈকে স্থগিত ৰাখিছে।
ইফালে আন এগৰাকী পলাতক ব্যৱসায়ী বিজয় মালিয়াৰ পুনৰ্বিচাৰ আবেদন সন্দৰ্ভত উচ্চতম ন্যায়ালয়ে নিজৰ ৰায় সুৰক্ষিত কৰি ৰাখিছে বুলি জানিব পৰা গৈছে।
আচলতে, মালিয়াই ২০১৭ চনৰ ৰায়ৰ বিৰুদ্ধে পুনৰ্বিচাৰৰ বাবে আবেদন জনাইছিল।
মালিয়াৰ বিৰুদ্ধে ৪০ মিলিয়ন ডলাৰ বেংকক আদায় দিয়াৰ বিপৰীতে নিজৰ পুত্ৰৰ একাউণ্টত ট্ৰেন্সফাৰ কৰাৰ অভিযোগ আছে।
