মঙলবাৰে গুৱাহাটীৰ কৃষক মুক্তি সংগ্ৰাম সমিতিৰ কেন্দ্ৰীয় কাৰ্য্যালয়ত নতুন ৰাজনৈতিক দল গঠনক কেন্দ্ৰ কৰি ৭০ টা সংগঠনৰ নেতৃত্বৰ মাজত এক গুৰুত্বপূৰ্ণ বৈঠক অনুষ্ঠিত হয়।
এই আলোচনাতে ৩০ চেপ্তেম্বৰত ৰাজনৈতিক দল গঠন হ’ব বুলি জানিবলৈ দিয়ে ৭০ টা জাতীয় সংগঠনৰ অন্যতম নেতা তথা অনুসুচিত জাতি যুৱ ছাত্ৰ পৰিষদৰ সভাপতি ৰুবুল দাসে।
বৈঠকত হোৱা আলোচনা সন্দৰ্ভত নৰ্থ-ইষ্ট নাওৰ সাংবাদিকৰ আগত দাসে কয় ‘ভ্ৰষ্টাচাৰী, স্বৈৰাচাৰী বিজেপি চৰকাৰক সমুলঞ্চে বিদায় দিয়াৰ উদ্দেশ্যে আঞ্চলিকতাবাদী প্ৰগতিশীল দল গঠন কৰাটো আজিৰ সভাত নিশ্চিতভাৱে প্ৰস্তাৱ গ্ৰহণ কৰা হ’ল। ৭০ টা জাতীয় সংগঠনৰ অন্তৰ্গত আটাইকেইটা সংগঠনৰ প্ৰতিনিধি সন্নিবিষ্ট কৰি অহা ৩০ চেপ্তেম্বৰত ৰাজ্যিক পৰ্য্যায়ত গঠন হ’বলগীয়া সমন্বয়ক কমিটিয়ে দলৰ নাম আৰু অনুসংগিক বিষয়বিলাক ঘোষণা কৰিব।‘
ইয়াৰোপৰি, সংসদীয় ৰাজনীতি আৰু নিৰ্বাচন সম্পৰ্কীয় বহু বিষয়ে আজি স্থান পাই বুলি উল্লেখ কৰি দাসে আৰু কয় ‘বিজেপিক প্ৰতিহত কৰাৰ উদ্দেশ্যে যিহেতু এই ৰাজনৈতিক দল গঠিত হ’ব গতিকে অসমৰ ৰাইজে বিচাৰিলে আঞ্চলিকতাবাদী ভাবাসম্পন্ন সকলো দলৰ লগতে আলাপ-আলোচনা আৰু মিত্ৰতা সম্ভৱ হ’ব। অসম জাতীয় পৰিষদৰ সৈতে মিত্ৰতা সন্দৰ্ভত আজি আলোচনা হোৱা নাই যদিও আগন্তুক দল গঠনৰ পাছত এই সম্পৰ্কে সমন্বয়কসকলে আলোচনা কৰিব।‘
তেওঁ লগতে কয় ‘বিজেপি চৰকাৰৰ ধৰ্মীয় সাম্প্ৰদায়িক ৰাজনীতিৰ বিৰুদ্ধে, দুৰ্নীতি-ভ্ৰষ্টাচাৰৰ বিৰুদ্ধে তথা অসমক থান-বান কৰি দিয়া নীতি, আৰু মুল্যবৃদ্ধি ইত্যাদি ইচ্ছু লৈ আগন্তুক দিনত সু-শাসন দিয়াৰ স্বাৰ্থত এই দল নিৰ্বাচনত নামিব।‘
আনহাতে, এই সন্দৰ্ভত ৭০ সংগঠনৰ অন্যতম নেতা তথা টাইপাৰ পৰা পদত্যাগ কৰা লোহিত গগৈয়ে আমাৰ সাংবাদিকৰ আগত কয় ‘প্ৰতিটো জাতীয়-জনগোষ্ঠীয় সংগঠনেই যাতে সমানে গুৰুত্ব লাভ কৰে তাৰ কাৰণে প্ৰতিটো সংগঠনৰ পৰা প্ৰতিনিধি ৰখাৰ ক্ষেত্ৰত আজিৰ বৈঠকত গুৰুত্ব প্ৰদান কৰা হয়। সমন্বয়কসকলে ৰাজনৈতিক দলৰ বিষয়টো আগবঢ়াই নিব। প্ৰক্ষেপিত সংগঠনৰ নেতৃত্ব বা প্ৰতিনিধিৰ মাজৰ পৰা মুখ্য সমন্বয়ক, জিলা সমন্বয়ক আৰু সমষ্টি হিচাপত বিষয়ববীয়া নিয়োগ কৰা হ’ব বুলি বৈঠকত আলোচনা হয়।‘
