কেইবা দশক জোৰা ৰাম জন্মভূমি-বাবৰি মছজিদ বিবাদৰ পৰিসমাপ্তি ঘটাৰ পিছত এইবাৰ দেশত মূৰ দাঙি উঠিছে আন এক ধৰ্মীয় বিতৰ্কই।
ৰাম মন্দিৰৰ পিছত মূৰ দাঙি উঠা বিতৰ্কটো হৈছে শ্ৰীকৃষ্ণৰ জন্মভূমিকলৈ হোৱা বিতৰ্ক।
হিন্দু ধৰ্মী লোকসকলে দাবী কৰি আহিছে যে শ্ৰীকৃষ্ণৰ জন্ম হৈছিল মথুৰাত।
যি স্থানত শ্ৰীকৃষ্ণৰ জন্ম হৈছিল সেই স্থানত এটা মন্দিৰ আছিল যদিও সেই মন্দিৰ ভাঙি তাত এটা শাহী দৰগাহ সজা হৈছে।
হিন্দু লোকসকলে দৰগাহটো সেই স্থানৰ পৰা আঁতৰাই নিবলৈ বাৰে বাৰে অনুৰোধ জনোৱাৰ পিছতো দৰগাহটো আঁতৰাই নিয়া নাই।
অৱশেষত আজি মথুৰাৰ আদালতত উত্তৰ প্ৰদেশৰ ৰাজন অগ্নিহোত্ৰী নামৰ লোক জনে এটা গোচৰ ৰুজু কৰিছে।
লোকজনে দাখিল কৰা অভিযোগত কোৱা হৈছে যে আদিতে সেয়া শ্ৰীকৃষ্ণৰ জন্মস্থান আছিল যদিও সেই স্থানৰ ১৩.৩৭ একৰ মাটি দখল কৰি শাহী দৰগাহ আৰু মছজিদ নিৰ্মাণ কৰা হৈছে।
সেয়ে সেই স্থানৰ পৰা দৰগাহ আৰু মছজিদ আঁতৰাই নিব লাগে।
একাংশ বুৰঞ্জীবিদৰ মতে আদিতে তাত কেশৱনাথ মন্দিৰ আছিল যদিও মোগল সম্ৰাট ঔৰংগজেৱে সেয়া ধ্বংস কৰি তাত মছজিদ স্থাপন কৰিছিল।
তাত থকা কৃষ্ণ মন্দিৰৰ তদাৰকীৰ দায়িত্ব ১৯৩৫ চনত এলাহাবাদ উচ্চ ন্যায়ালয়ে মথুৰাৰ ৰাজ পৰিয়ালক দিছিল যদিও পিছলৈ সেয়া বিশ্ব হিন্দু পৰিছদৰ হাতলৈ যায়।
ইপিনে ১৯৯১ চনৰ ‘Places of Worship (Special Provisions Act)’ আইন মতে স্বাধীনতাৰ পিছত কেৱল অযোধ্যাৰ ৰাম মন্দিৰৰ বাদে আন কোনো মন্দিৰৰ অস্তিত্ব সন্দৰ্ভত কোনো আইনী যুঁজ চলোৱা নাযাব।
এই আইন থকাৰ পিছত কৃষ্ণ মন্দিৰ সম্পৰ্কীয় গোচৰটো সম্পৰ্কত আদালতে কেনে প্ৰতিক্ৰিয়া ব্যক্ত কৰে সেয়া লক্ষণীয় হব।
