অসমৰ অন্যতম পুৰণি সাংবাদিক সংস্থা শিৱসাগৰ জিলা সাংবাদিক সংস্থাই অতিক্ৰম কৰিলে গৌৰৱোজ্জল ৫৬ টা বছৰ।
১৯৬৪ চনৰ ২৭ ছেপ্তেম্বৰত প্ৰয়াত শিক্ষাবিদ পৱনাথ শৰ্মা, চন্দ্ৰ ভূঞা, বীৰেন বৰকটকী, প্ৰফুল্ল চন্দ্ৰ দত্ত, সোমেশ্বৰ কাকতি, গদা চুতীয়া, নীল গোহাঁই আদিৰ প্ৰচেষ্টাত গঢ় লৈ উঠিছিল শিৱসাগৰ জিলা সাংবাদিক সংস্থা।
উল্লেখ্য যে, অসম সাহিত্য সভাৰ দুজনকৈ প্ৰাক্তন সভাপতি ক্ৰমে বীৰেন বৰকটকী আৰু ড° লীলা গগৈ শিৱসাগৰ জিলা সাংবাদিক সংস্থাৰ প্ৰাক্তন সভাপতি আছিল।
ইয়াৰ উপৰি অসমৰ প্ৰথম গৰাকী ছহিদ সাংবাদিক কমলা শইকীয়াক শিৱসাগৰ জিলা সাংবাদিক সংস্থাৰ সভাপতি হৈ থকা অৱস্থাতে হত্যা কৰা হৈছিল।
আজি সাংবাদিক সংস্থাৰ কাৰ্যালয়ত সমগ্ৰ বিশ্বজুৰি চলি থকা ক’ৰ’না মহামাৰীৰ সংক্ৰমণ প্ৰতিৰোধৰ স্বাৰ্থত চলি থকা বিভিন্ন চৰকাৰী নীতি নিৰ্দেশনাৰ প্ৰতি সন্মান জনাই শিৱসাগৰ জিলা সাংবাদিক সংস্থাই প্ৰতিষ্ঠা দিৱসটি অনুষ্টুপিয়াকৈ উদযাপন কৰে।
সংস্থাৰ সভাপতি সোমেশ ডেকাই পতাকা উত্তোলন কৰা আৰু সম্পাদক জয়জ্যোতি গগৈয়ে উদেশ্য বাখ্যা কৰা প্ৰতিষ্ঠা দিৱসৰ অনুষ্ঠানত শৈক্ষিক দিশত শিৱসাগৰ জিলাখনক শ্ৰেষ্ঠ জিলা হিচাপে গঢ়ি তোলাৰ ক্ষেত্ৰত বিশেষ ভূমিকা গ্ৰহণ কৰা বিদ্যালয় সমূহৰ পৰিদৰ্শক আব্দুল জেলিলক সম্বৰ্দ্ধনা জনোৱা হয়।
উক্ত অনুষ্ঠানত উপস্থিত থাকি লেখক সমালোচক চামচুল বাৰিক, সন্তোষ দত্ত, মনোজ গগৈ, হৰেশ বৰুৱাকে ধৰি কেইবাজনো ব্যক্তিয়ে বক্তব্য আগবঢ়ায়।
