আৰম্ভ কৰিছিল সাধুকথা কোৱাৰ বিষয়ক লৈ, সমাপ্তি ঘটালে কৃষি বিধেয়কৰ সাধুকথাৰে।
এয়াই আছিল প্ৰধানমন্ত্ৰী নৰেন্দ্ৰ মোডীৰ অল ইণ্ডিয়া ৰেডিঅ’ যোগে সম্প্ৰচাৰ কৰা ৬৯ সংখ্যক মন কী বাতৰ আজিৰ খণ্ডৰ মূল কথা।
শিশুসকলক কিদৰে সাধুকথা কৈ নানান কথা শিকাব পাৰি সেই বিষয়ৰে মন কী বাতৰ ভাষণ আৰম্ভ কৰি মোডীয়ে কয় যে সাধুকথা কোৱাৰ পৰম্পৰা ভাৰতৰ অতি পুৰণি পৰম্পৰা।
ক’ৰ’ণাতংকৰ সময়ত এতিয়া পৰিয়ালৰ সদস্যসকল কাষ চাপি আহিছে।
এই সময় খিনিত সেয়ে শিশু সকলক সাধু শুনোৱাৰ বিষয়ত মোডীয়ে অধিক গুৰুত্ব দিয়ে।
শিশুক সাধুকথা শুনোৱাৰ কথাৰ পৰা হঠাতে ফালৰি কাটি মোডীয়ে এইবাৰ আৰম্ভ কৰিলে কৃষকক সাধুকথা শুনাবলৈ।
নতুনকৈ গ্ৰহণ কৰা কৃষি বিধেয়ক কেইখনে কিদৰে কৃষকৰ পৰম উপকাৰ সাধিব সেই বিষয়ত মোডীয়ে ৰসাল ভাৱে কৃষকক বুজাবলৈ ধৰিলে।
এই প্ৰসংগতে মোডীয়ে হাৰিয়ানাৰ কৃষক পৰিয়ালৰো উদাহৰণ দাঙি ধৰিলে।
কৃষি বিধেয়কৰ ফলত কৃষকসকলে কিদৰে এতিয়া বজাৰৰ সলনি ব্যক্তিগত কোম্পানীক তেওঁলোকৰ উৎপাদিত শস্য বিক্ৰি কৰিব পাৰিব সেই কথাও মোডীয়ে সাধুকথাৰ চলেৰেই বুজাই দিলে।
মোডীয়ে ক’লে যে কৃষকে এতিয়া বজাৰৰ সলনি পঞ্চ তাৰকা যুক্ত হোটেলতো নিজৰ উৎপাদিত সামগ্ৰী বিক্ৰি কৰিবলৈ সক্ষম হ’ব।
