অসমত চৰকাৰ আৰু বেচৰকাৰী সংস্থাসমূহে মহিলাৰ বিৰুদ্ধে সংঘটিত হোৱা অপৰাধ কমাবলৈ নানা ধৰণৰ পদক্ষেপ গ্ৰহণ কৰি অহা স্বত্তেও যে সফল হ’ব পৰা নাই তাৰেই জ্বলন্ত প্ৰমাণ হৈছে ৰাজ্যখনৰ ধুবুৰী জিলাত উদ্বেগজনকভাৱে মহিলাৰ বিৰুদ্ধে ক্ৰমশ বাঢ়ি অহা অপৰাধৰ ঘটনাৰ বৰ্ধিত পৰিসংখ্যা। শেহতীয়াভাৱে জিলাখনৰ মুঠ আঠখন আৰক্ষী থানাত পঞ্জীয়ন হোৱা অপৰাধৰ তালিকাত মহিলাৰ বিৰুদ্ধে সংঘটিত হোৱা অপৰাধৰ বাঢ়ি অহাটো লক্ষ্য কৰা গৈছে ।
লাভ কৰা তথ্য অনুযায়ী, ২০১৭ চনত ধুবুৰীৰ মুঠ ৮খন আৰক্ষী থানাত পঞ্জীয়নভুক্ত হোৱা গোচৰৰ ভিতৰত মহিলাৰ বিৰুদ্ধে সংঘটিত হোৱা অপৰাধৰ ভিতৰত প্ৰতি মাহৰ গড় সংখ্যা আছিল ১৪৩টা যিটো ২০১৬ বছৰৰ গড় ৩১৮তকৈ অধিক।
আৰক্ষীৰ প্ৰতিবদনত প্ৰকাশ পোৱা মতে জিলাখনত ২০১৭ চনত মহিলাৰ বিৰুদ্ধে হত্যা, বলাৎকাৰ, অপহৰণ, যৌতুকজনিত মৃত্যু, যৌতুকজনিত হত্যা, যৌন নিৰ্যাতন, স্বামীৰ দ্বাৰা হিংসা, বে-আইনী সৰবৰাহ আদি সৰ্বমুঠ ১৭২৪টা গোচৰ পঞ্জীয়নভুক্ত হৈছিল। ২০১৬ চনত সংঘটিত হোৱা এনেধৰণৰ গোচৰৰ সংখ্যা আছিল ১৬৫৭টা।
লক্ষ্যণীয়ভাৱে চলিত বছৰৰ জানুৱাৰি মাহত জিলাখনত মহিলাৰ বিৰুদ্ধে সংঘটিত হোৱা ১১২টা গোচৰ ইতিমধ্যে আৰক্ষী থানাত পঞ্জীয়নভুক্ত হৈছে।
২০১৭ চনৰ তথ্য অনুযায়ী জিলাখনত মহিলাৰ বিৰুদ্ধে সংঘটিত হোৱা মুঠ অপৰাধৰ ভিতৰত অধিক সংখ্যকেই হৈছে স্বামীৰ দ্বাৰা নিৰ্যাতনত ঘটনা। বিগত বছৰত প্ৰায় ১০৩৪টা এই ধৰণৰো গোচৰ আৰক্ষী তানাত পঞ্জীয়নভুক্ত হৈছিল।
তাৰোপৰি, ৩৬৩টা যৌন নিৰ্যাতন, ১৯২টা অপহৰণ আৰু ১০২টা বলাৎকাৰৰ গোচৰ পঞ্জীয়নভুক্ত কৰা হৈছিল।
আৰক্ষীৰ তৰফৰ পৰা জনোৱা হৈছে যে অৱশ্যেই এই তথ্যখিনি জিলাখনত মহিলাৰ বিৰুদ্ধে সংঘটিত অপৰাধৰ প্ৰকৃত তথ্য নহয়। কাৰণ বিভিন্ন কাৰণত বহুতো ঘটনা পঞ্জীয়ন নোহোৱাকৈ থাকি যায় ।
আৰক্ষীয়ে আৰু জনাইছে যে বাল্য বিবাহ প্ৰতিবন্ধক আইন-২০০৬ আৰু যৌন অপৰাধৰ পৰা শিশু সুৰক্ষা আইন-২০১২ (পিঅচিএছঅ এক্ট) ৰ অধীনত ভালেমান গোচৰ পঞ্জীয়ন কৰা হৈছে। এই গোচৰত বেছিভাগেই হৈছে কন্যা শিশু।
এই তথ্য অনুসৰি জিলাখনত বাল্য বিবাহৰ পৰিসংখ্যা যথেষ্ট অধিক।
মহিলা অধিকাৰ কৰ্মী আৰু লেখিকা ছুলতানা ছালিমা আহমেদে নৰ্থ ইষ্ট নাওৰ সৈতে হোৱা এটা সাক্ষাৎকাৰত প্ৰকাশ কৰিছে যে মহিলাৰ বিৰুদ্ধে এনে ধৰণৰ পৰাধ বাঢ়ি অহাৰ কাৰণ হৈছে দাৰিদ্ৰ আৰু নিৰক্ষৰতা।
আহমেদে কয় যে দুখীয়া পৰিয়ালৰ কন্যা শিশুক বিদ্যালয়লৈ যাবলৈ দিয়া নহয় আৰু গ’লেও ৪ৰ্থ মান বা ৫ম মানৰ পৰা অধিক পঢ়িবলৈ দিয়া নহয়। ছোৱালীক অতি কম বয়সতে বিয়া দিয়া হয় আৰু সন্তান জন্ম দিয়া মেচিন হিচাপে ব্যৱহাৰ কৰা হয়।
‘’এনে ক্ষেত্ৰত তেওঁলোকক তেওঁলোকক নিজৰ অধিকাৰ সম্পৰ্কে অৱগত কৰাটো সম্ভৱ নহয়’’ -লেখিকাগৰাকীয়ে মন্তব্য কৰিছে।
লেখিকাগৰাকীয়ে আৰু কৈছে যে তেওঁলোকৰ ওচৰে পাঁজৰে থকা অন্যন্য মহিলাৰ বিৰুদ্ধে সংঘটিত হোৱা নিৰ্যাতন সদায় দেখি থাকি ডাঙৰ হোৱা সকলে তেওঁলোকৰ বিৰুদ্ধে হোৱা নিৰ্যাতনকো স্বাভাৱিক বুলি মানি লোৱাৰ মানসিকতা গঢ়ি উঠিছে।
মহিলাৰ বিৰুদ্ধে ক্ৰমে বাঢ়ি অহা অপৰাধৰ সন্দৰ্ভত নিজৰ প্ৰতিক্ৰিয়া প্ৰকাশ কৰি পি বি কলেজৰ সহকাৰী অধ্যাপিকা তথা মহিলা অধিকাৰ কৰ্মী পাৰবীন ছুলতানাই কৈছে,’’মহিলাৰ অৱস্থা কিছু পৰিমাণে উন্নত হৈছে যদিও যথাৰ্থতে মহিলা সৱলীকৰণৰ ক্ষেত্ৰত বহুতো কৰণীয় আছে।
তেওঁ আৰু কৈছে,’’ মহালাৰ বিৰুদ্ধে সংঘটিত হোৱা অপৰাধৰ বৰ্ধিত হাৰৰ পৰা জানিব পাৰি কেনেদৰে মহালাৰ বাবে নিৰাপদ স্থান নোহোৱা হৈ আহিছে। ইয়ে মহিলাৰ বাবে গতিশীলতা আৰু নিয়োগৰ সুযোগ সুবিধা লাভ সংকুচিত কৰি আনিছে।‘’
অধ্যাপিকা পাৰবীন ছুলতানাই কয় ‘’কিছু কিছু ক্ষেত্ৰত মাটি সংক্ৰান্তীয় বিবাদত ইটো পৰিয়ালে সিটো পৰিয়ালৰ ওপৰত যৌন নিৰ্যাতনৰ গোচৰ জাপি দিব বিচাৰে। এই ক্ষেত্ৰটো মহিলাগৰাকীহে বলিৰ পঠা হ’ব লগীয়া হয়।’’ এনেধৰণৰ ঘটনাই মহিলাৰ ওপৰত চলা নিৰ্যাতনৰ প্ৰকৃত ছবিখনৰ পৰা মনোযোগ আঁতৰাই নিয়ে বুলি অধ্যাপিকাগৰাকীয়ে মন্তব্য কৰে।
