আজি নাজিৰাত উপস্থিত হৈ নাজিৰাৰ বাট পথ উন্নয়ণৰ বাবে ৬০ কোটি টকাৰ এক আঁচনি শুভাৰম্ভ কৰে শিক্ষা, স্বাস্থ্য, বিত্ত, গড়কপ্তানী মন্ত্ৰী হিমন্ত বিশ্ব শৰ্মাই।
ৰাজ্যিক স্ব অগ্ৰাধিকাৰ ৰ শিতানত নাজিৰাৰ সাতটা ৰাস্তা নিৰ্মাণৰ শুভাৰম্ভ কৰে মন্ত্ৰী হিমন্ত বিশ্ব শৰ্মাই। ২০২১ ৰ বিধান সভা নিৰ্বাচনৰ পূৰ্বে এই সমুহ ৰাস্তা সম্পূৰ্ণ হৈ উঠিব বুলি কয় বিত্ত তথা গড়কপ্তানী মন্ত্ৰী হিমন্ত বিশ্ব শৰ্মাই।
ইয়াৰোপৰি ৰাজনীতিত তেওঁৰ গুৰু বুলি জনাজাত প্ৰয়াত মুখ্যমন্ত্ৰী হিতেশ্বৰ শইকীয়াৰ সমাধি ক্ষেত্ৰত শ্ৰদ্ধাঞ্জনি জনোৱাৰ লগতে কৰ্মশ্ৰী হিতেশ্বৰ শইকীয়াৰ প্ৰতিমূৰ্তিত সেৱা জনায়। হিতেশ্বৰ শইকীয়াদেৱৰ প্ৰতিমূৰ্তি আৰু সমাধি ক্ষেত্ৰটো সুন্দৰকৈ নিৰ্মাণৰ বাবে ২৫ লাখ টকা প্ৰদান কৰিব বুলি ঘোষণা কৰে।
নাজিৰা ভ্ৰমণ কালত মন্ত্ৰীগৰাকীয়ে সদ্য প্ৰয়াত বিজেপি নেতা, বিশিষ্ট চিকিৎসক তথা ক্ৰীড়া সংগঠক ডাঃ প্ৰবীণ কোঁৱৰ আৰু অশ্বিনী চেতিয়াৰ বাসগৃহত উপস্থিত হৈ পৰিয়ালৰ লোকক সমবেদনা জ্ঞাপন কৰে।
মন্ত্ৰী হিমন্ত বিশ্ব শৰ্মাৰ লগত ৰাজ্যিক স্বাস্থ্য মন্ত্ৰী পিয়ুষ হাজৰিকা, মন্ত্ৰী যোগেন মহন, নাজিৰা সমষ্টিৰ বিধায়ক দেৱব্ৰত শইকীয়া, সোণাৰী সমষ্টিৰ বিধায়িকা নবনীতা সন্দিকৈ, ৰাজ্যিক যুৱ মৰ্চাৰ সম্পাদক ময়ুৰ বৰগোঁহাই উপস্থিত থাকে।
ইয়াৰ পিছতেই মন্ত্ৰীগৰাকীয়ে শিৱসাগৰত অনুষ্ঠিত অসম ৰাজ্যিক জনতা যুৱ মৰ্চাৰ ৰাজ্যিক কাৰ্যনিৰ্বাহক সভাত অংশগ্ৰহণ কৰিবলৈ শিৱসাগৰলৈ যাত্ৰা কৰে।
