বিশ্বমানৰ শিক্ষাৰে দেশৰ ছাত্ৰ-ছাত্ৰীসকলক শিক্ষিত কৰি তোলাৰ বাবে পদক্ষেপ গ্ৰহণ কৰিছে কেন্দ্ৰীয় চৰকাৰে।
কেন্দ্ৰীয় শিক্ষা মন্ত্ৰী ৰমেশ পখ্ৰিয়াল নিশাংকে এই সন্দৰ্ভত মন্তব্য কৰি কয় যে দেশৰ প্ৰায় ৭,৫০,০০০ গৰাকী ছাত্ৰ-ছাত্ৰীয়ে প্ৰতি বছৰে উচ্চ শিক্ষা গ্ৰহণ কৰাৰ বাবে বিদেশলৈ যায়।
ফলত দেশৰ প্ৰায় ১৫ বিলিয়ন মাৰ্কিন ডলাৰ বাহিৰলৈ ওলাই গৈ আছে। এনে পৰিস্থিতিত চৰকাৰে দেশতে থাকি যাতে বিদেশৰ বিশ্ব বিদ্যালয়ে আগবঢ়োৱা শিক্ষা গ্ৰহণ কৰিব পাৰে তাৰ ব্যৱস্থা কৰাৰ কথা চিন্তা কৰিছে।
শিক্ষা খণ্ডত অধিক উদাৰীকৰণৰ পথ প্ৰশস্ত কৰাৰ বাবে ভাৰত চৰকাৰে শীঘ্ৰে আইন প্ৰণয়ন কৰিব বুলিও তেওঁ প্ৰকাশ কৰে।
তেওঁ লগতে কয় যে বিদেশৰ বহু কেইখন বিশ্ব বিদ্যালয়ে ইতিমধ্যে ভাৰত চৰকাৰৰ সৈতে ভাৰতত কেম্পাছ স্থাপনৰ বাবে যোগাযোগ কৰিছে।
বহু কেইখন বিদেশৰ বিশ্ব বিদ্যালয়ে ভাৰতৰ বিশ্ব বিদ্যালয়ৰ সৈতে চুক্তি কৰি ভাৰতত শৈক্ষিক কাৰ্যসূচীও আৰম্ভ কৰিছে।
ভাৰতত কেম্পাছ স্থাপন কৰিব বিচৰা বিদেশৰ বিশ্ব বিদ্যালয় সমূহৰ ভিতৰত বিশ্ব বিখ্যাত অক্সফোৰ্ড বিশ্ব বিদ্যালয়,য়েল বিশ্ব বিদ্যালয় আদি অন্যতম।
বিদেশৰ বিশ্ব বিদ্যালয় স্থাপনৰ বাবে সেয়ে নতুন আইনৰ প্ৰয়োজনীয়তা আহি পৰিছে।