দেশজুৰি তোলপাৰ লগোৱা হাথৰাছ বলাৎকাৰ কাণ্ডৰ তদন্তৰ ভাৰ অৱশেষত আনুষ্ঠানিক ভাবে চিবিআইক অৰ্পণ কৰিলে কেন্দ্ৰীয় চৰকাৰে।
শেহতীয়াকৈ কেন্দ্ৰই জাৰি কৰা এক নিৰ্দেশনা যোগে হাথৰাছত এগৰাকী ১৯ বছৰীয়া দলিত সম্প্ৰদায়ৰ যুৱতীক উচ্চ বৰ্ণৰ চাৰিজন লোকে বলাৎকাৰ কৰা বুলি উত্থাপিত অভিযোগৰ তদন্ত কৰিবলৈ চিবিআইক নিৰ্দেশ দিয়া হৈছে।
প্ৰথাৱস্থাত হাথৰাছত কোনো বলাৎকাৰ সংঘটিতই হোৱা নাছিল বুলি দাবী কৰা উত্তৰ প্ৰদেশৰ চৰকাৰে বিষয়টোকলৈ সমগ্ৰ দেশতে সৃষ্টি হোৱা ব্যাপক প্ৰতিক্ৰিয়াত সেওঁ মানি ঘটনাটোৰ তদন্ত চিবিআইৰ হতুৱাই কৰোৱা হ’ব বুলি ঘোষণা কৰিছিল।
অৱশেষত কেন্দ্রই উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ অনুৰোধ মৰ্মে এই নাৰকীয় ঘটনাটোৰ তদন্তৰ ভাৰ চিবিআইক অৰ্পন কৰে।
উল্লেখ্য হাথৰাছৰ ১৯ বছৰীয়া দলিত যুৱতী গৰাকীক ১৪ ছেপ্তেম্বৰত চাৰিজন উচ্চ বৰ্ণৰ লোকে বলাৎকাৰ কৰাৰ লগতে নিৰ্যাতিতাৰ ওপৰত অকথ্য অত্যাচাৰ চলাইছিল।
যুৱতী গৰাকীৰ ৰাজহাড় ভাঙি পেলোৱাৰ লগতে জিভাও কাটি দিয়া হৈছিল বুলি বহুতে অভিযোগ কৰি আহিছে।
যুৱতী গৰাকীক পিছত দিল্লীৰ এখন চিকিৎসালয়ত ভৰ্তি কৰোৱা হৈছিল যদিও ২৯ ছেপ্তেম্বৰত তেওঁৰ মৃত্যু ঘটিছিল।
ইয়াৰ পিছতে যুৱতী গৰাকীৰ মৃতদেহ পৰিয়ালৰ অনুপস্থিতিতে আৰক্ষীয়ে মাজনিশা জ্বলাই দিছিল।
