নাটক নহয়, কাশ্মীৰত সন্ত্ৰাসবাদীৰ আত্মসমৰ্পণৰ ‘লাইভ ভিডিঅ’ প্ৰকাশ কৰিলে সেনাই

কাশ্মীৰত সেনাৰ সন্ত্ৰাস বিৰোধী অভিযানৰ সময়ত এজন সন্ত্ৰাসবাদীয়ে আত্মসমৰ্পণ কৰিলে। কেইদিনমান পূৰ্বে সন্ত্ৰাসবাদীৰ দলত যোগ দিয়া যুৱকজনৰ লগত আছিল এ কে-৪৭ এছ’ল্ট ৰাইফল।

সেই সন্ত্ৰাসবাদীজনৰে আত্মসমৰ্পণৰ ভিডিঅ’ প্ৰকাশ কৰিছে সেনাবাহিনীয়ে।

ভিডিঅ’ত যুৱকজনে এটা ট্ৰাউজাৰ পিন্ধি থকা দেখা গৈছে। হাত দুখন ওপৰলৈ তুলি আগবাঢ়ি আহিছে যুৱকজন আৰু সেনা বিষয়াই কোৱা শুনা গৈছে, ‘গুচি আহা, কোনোৱে গুলী নচলাবা’।

এখন ফলৰ বাগানত লুকাই থকা একুৰিৰ দেওনা পাৰ হোৱা সেই সন্ত্ৰাসবাদী যুৱকজনে কেইদিনমান পূৰ্বে সন্ত্ৰাসবাদী দলত যোগ দিছিল।

শুকুৰবাৰে সেনাবাহিনীয়ে চলোৱা এক অভিযানত সন্ত্ৰাসৰবাদীজনৰ সন্ধান পায় দলটোৱে।

ভিডিঅ’টোত এজন বন্দুকধাৰী সেনাক দেখা গৈছে। অলপ সময়ৰ পাছতে বাগানৰ ভিতৰত লুকাই থকা সেই সন্ত্ৰাসবাদী যুৱকজন হাত ওপৰলৈ তুলি আগুৱাই আহে।

বাতৰি অনুসৰি, সেই সন্ত্ৰাসবাদী যুৱকজনৰ নাম জাহাংগীৰ ভাট।

One SPO went missing with two AK-47 on 13 Oct 20. Same day, Jahangir Ah Bhat (31 yr old shopkeeper) from Chadoora had gone missing too. Today, he was apprehended with one AK rifle.#Kashmir https://t.co/D2p2WmHqal pic.twitter.com/44YdqxGTSe

— Chinar Corps🍁 – Indian Army (@ChinarcorpsIA) October 16, 2020

সেনাই জানিবলৈ দিয়া মতে, জাহাংগীৰে যোৱা ১৩ অক্টোবৰত নিৰুদ্দেশ হোৱাৰ পাছত পৰিয়ালে তেওঁৰ সন্ধান চলাইছিল। সেইদিনাই দুটা এ কে-৪৭লৈ এগৰাকী বিশেষ আৰক্ষী বিষয়াও পলায়ন কৰে।

অৱশেষত সেনাৰ যৌথ অভিযানত জাহাংগীৰৰ সন্ধান লাভ কৰে সেনাই। নিয়ম অনুসৰিয়েই তেওঁক আত্মসমৰ্পণৰ বাবে নিৰ্দেশ দিয়া হয়।

আত্মসমৰ্পণ কৰিবলৈ ৰাজী হৈ জাহাংগীৰে হাত দুখন ওপৰলৈ তুলি সেনাৰ দলটোৰ পিনে আগুৱাই আহে।