কৰ’না ভাইৰাছৰ সংক্ৰমণৰ বাবে বংগবন্ধু শ্বেখ মুজিবুৰ ৰহমানৰ জন্ম শতবাৰ্ষিকী অনুষ্ঠানলৈ যাব নোৱাৰিলে প্ৰধান মন্ত্ৰী নৰেন্দ্ৰ মোদী।
এইবাৰ বাংলাদেশৰ স্বাধীনতাৰ ৫০ বছৰ পূৰ্ণ হোৱা উপলক্ষে ঢাকাত আয়োজিত অনুষ্ঠানলৈ আমন্ত্ৰণ জনোৱা হৈছে প্ৰধান মন্ত্ৰী মোদীক।
দেশখনৰ বিদেশ মন্ত্ৰী ড০ এ কে আব্দুল মোমেনে কয় যে ভাৰতৰ প্ৰধান মন্ত্ৰী নৰেন্দ্ৰ মোদী অহা বছৰৰ ২৬ মাৰ্চত বাংলাদেশলৈ আহিব পাৰে। মোদীক ঢাকা ভ্ৰমণলৈ আমন্ত্ৰণ জনোৱা হৈছে।
উল্লেখ্য যে ১৯৭১চনৰ ২৬ মাৰ্চৰ মাজনিশা শ্বেখ মুজিবুৰ ৰহমান পাকিস্তানী সেনাৰ হাতত গ্ৰেপ্তাৰ হৈছিল।
শ্বেখ মুজুবুৰ ৰহমানে গ্ৰেপ্তাৰ হোৱাৰ অলপ আগেয়ে ২৬ মাৰ্চৰ পুৱতি নিশা তেওঁ বাংলাদেশৰ স্বাধীনতাৰ ঘোষণা পত্ৰত স্বাক্ষৰ কৰিছিল।
বাংলাদেশৰ স্বাধীনতাৰ পাছত এই দিনটো স্বাধীনতা দিৱস হিচাপে পালন কৰি অহা হৈছে।
দেওবাৰে ঢাকাত নতুনকৈ নিযুক্ত ভাৰতীয় উচ্চায়ুক্ত বিক্ৰম কুমাৰ ডোৰাইস্বামীৰ বিদেশ মন্ত্ৰীৰ সৈতে বৈঠক অনুষ্ঠিত হয়। ইয়াৰ পাছতে বিদেশ মন্ত্ৰী গৰাকীয়ে ভাৰতৰ প্ৰধান মন্ত্ৰী বাংলাদেশলৈ অহাৰ সম্ভাৱনাৰ কথা সদৰী কৰে।
তেওঁ লগতে জানিবলৈ দিয়ে যে অহা ১৬ডিচেম্বৰত প্ৰধান মন্ত্ৰী শ্বেখ হাছিনাই ভাৰতৰ প্ৰধান মন্ত্ৰী নৰেন্দ্ৰ মোদীৰ সৈতে এক ভাৰ্চুৱেল বৈঠকত মিলিত হ’ব পাৰে।
