নেপালৈ গৈ বহু ভাৰতীয় লোকে বিভিন্ন ধৰণৰ ৰোগৰ চিকিৎসা কৰোৱাই আহিছে।
বিশেষকৈ চকুৰ চিকিৎসাৰ বাবে বহু ভাৰতীয় লোকে নেপাললৈ গৈ আছিল।
শেহতীয়াকৈ ক’ৰ’ণাতংক আৰু ভাৰত-নেপালৰ মাজত সৃষ্টি হোৱা উত্তেজনাৰ বাবে বিগত ৭ মাহ ধৰি নেপালে ভাৰতৰ সৈতে থকা সীমান্ত চকী সমূহ বন্ধ কৰি ৰাখিছিল।
ভাৰতে বহুলোকৰ অসুবিধাৰ প্ৰতি লক্ষ্য ৰাখি নেপালৰ চৰকাৰক সীমান্ত পুনৰ মুকলি কৰিবলৈ আহ্বান জনা আহিছিল যদিও নেপালে ভাৰতৰ আহ্বানৰ প্ৰতি কোনো গুৰুত্ব দিয়া নাছিল ।
অৱশেষত আজি নেপালে ভাৰতৰ সৈতে থকা সীমান্ত ৰেখা মুকলি কৰি দিয়াৰ সিদ্ধান্ত গ্ৰহণ কৰে।
নেপাল চৰকাৰৰ এগৰাকী মুখপাত্ৰই প্ৰকাশ কৰা মতে আজিৰে পৰা নেপালে ভাৰতৰ ৰাক্সাউল সীমান্তৰ লগতে সকলো সীমান্ত খুলি দিছে।
উল্লেখ্য ক’ৰ’ণাতংকৰ দোহাই দি নেপালে ২৩ মাৰ্চৰ দিনাই ভাৰতৰ সৈতে থকা সকলো সীমান্ত অঞ্চল বন্ধ কৰি দিছিল।
কেৱল সেয়াই নহয়, নেপালে সীমান্তত ব্যাপক মাত্ৰাত নিৰাপত্তা বাহিনীৰ জোৱানো মোতায়েন কৰিছিল।
নেপালৰ প্ৰধানমন্ত্ৰী কে পি শৰ্মা অলিয়ে ভাৰতৰ সৈতে থকা নেপালৰ সীমান্ত ১৫ নৱেম্বৰলৈ বন্ধ ৰখাৰ পোষকতা কৰিছিল যদিও সীমান্ত বন্ধ হোৱাৰ ফলত সীমান্তৱৰ্তী গাওঁত বাসকৰা নেপালী লোকসকলো যথেষ্ট অসুবিধাৰ সন্মুখীন হ’বলগীয়া হৈছিল।সেইবাবে তেওঁলোকেও সীমান্ত খোলাটো বিচাৰিছিল।
