ক’ৰ’নাৰ মহাসংসক্ৰণৰ প্ৰতি লক্ষ্য ৰাখি ভাৰতৰ বিপৰীতে য়ুনাইটেড আৰব এমিৰেটছ চমুকৈ য়ুএইত অনুষ্ঠিত হোৱা চলিত বৰ্ষৰ আই পি এলৰ প্লে অফলৈ যোগ্যতা অৰ্জন কৰিলে মুম্বাই ইণ্ডিয়ানছ দলে।
মুম্বাই আই পি এল ২০২০ৰ প্লে অফলৈ উত্তীৰ্ণ হোৱা প্ৰথমটো দল হিচাপে পৰিগণিত হৈছে।
বুধবাৰে ৰয়েল চেলেঞ্জাৰ্ছ বাংগালুৰুৰ বিৰুদ্ধে খেলা মেচখনত জয়ী হোৱাৰ লগে লগে মু্ম্বাইয়ে প্লে অফত নিজৰ স্থান সুৰক্ষিত কৰিবলৈ সক্ষম হয়।
বুধবাৰৰ মেচখনত মুম্বাই ইণ্ডিয়ানছে প্ৰথমে টছত বিজয়ী হৈ বাংগালুৰুক বেটিং কৰিবলৈ নিমন্ত্ৰণ জনায়।
ৰয়েল চেলেঞ্জাৰ্ছৰ অপেনাৰদ্বয় ফিলিপ আৰু দেৱদূতৰ আকৰ্ষণীয় বেটিঙৰ সহায়ত ২০ অ’ভাৰৰ অন্তত ৬টা উইকেট হেৰুৱাই ১৬৪ ৰান কৰিবলৈ সক্ষম হয়।
বাংগালুৰু হৈ দেৱদূতে সৰ্বোচ্চ ৪৫ বলত ৭৪ আৰু ফিলিপে ২৪ বলত ৩৩ ৰান সংগ্ৰহ কৰে।
ইফালে ১৬৫ ৰানৰ লক্ষ্য লৈ বেটিং কৰিবলৈ অহা মুম্বাই ইণ্ডিয়ানছে সূৰ্যকুমাৰ যাদৱৰ অপৰাজিত ৪৩ বলত ৭৯ ৰানৰ সহায়ত মেচৰ পাঁচটা বল বাকী থকা অৱস্থাত বিজয়ী হয়।
দৰ্শনীয় অৰ্ধশতকেৰে দলক বিজয়ী কৰোৱা সূৰ্যকুমাৰ যাদৱক মেন অফ দ্যা মেটছৰ বঁটা দিয়া হয়।
