দেওবাৰে পুৱা কাৰাৰুদ্ধ সাংবাদিক অৰ্ণৱ গোস্বামীক ৰায়গড়ৰ পৰা নৱী-মুম্বাইৰ কুখ্যাত তাল’জা কাৰাগাৰলৈ স্থানান্তৰ কৰা হয়।
আৰক্ষীৰ অভিযোগ যে ন্যায়িক জিম্মাত আলিবাগত কাৰাৰুদ্ধ হৈ থকা বিতৰ্কিত সাংবাদিক গৰাকীয়ে মোবাইল ফোন ব্যৱহাৰ কৰিছিল।
উল্লেখ্য যে আত্মহত্যাৰ পৰোচনাৰ গোচৰত গ্ৰেপ্তাৰ হোৱা অৰ্ণৱ গোস্বামীক আলীগড় আদালতে ১৪ দিনৰ ন্যায়িক জিম্মালৈ প্ৰেৰণ কৰিছিল। তেতিয়াৰ পৰাই বিতৰ্কিত সাংবাদিক গৰাকীয়ে আলিবাগত কাৰাৰুদ্ধ হৈ আছিল।
তদন্তকাৰী বিষয়াৰ জামিল শ্বেইখৰ উদ্ধৃতিৰে ইণ্ডিয়া টুডেৰ বাতৰিত কোৱা হৈছে যে কাৰাৰুদ্ধ সাংবাদিক গৰাকীয়ে কাৰাগাৰৰ ভিতৰত মোবাইল ফোন ব্যৱহাৰ কৰাৰ প্ৰমাণ পোৱা গৈছে।
“যোৱা শুকুৰবাৰে সন্ধিয়া গোস্বামীয়ে কাৰোবাৰ পৰা মোবাইল ফোন লৈ চ’ছিয়েল মিডিয়াত সক্ৰিয় হৈ আছিল। বুধবাৰে ৱাৰ্লীৰ তেওঁৰ বাসগৃহৰ পৰা গ্ৰেপ্তাৰ কৰাৰ সময়ত তেওঁৰ ফোন আমি জব্দ কৰিছিলো। গোচৰটোৰ তদন্তকাৰী বিষয়া হিচাপে মই আলিবাগ জেইলৰ অধীক্ষকলৈ কাৰাৰুদ্ধ অৱস্থাত তেওঁৰ কাৰ পৰা মোবাইল ফোন লাভ কৰিলে সেয়া তদন্ত কৰিবলৈ এখন পত্ৰ প্ৰেৰণ কৰিছো। ইয়াৰ বাবেই দেওবাৰে পুৱা তেওঁক আলিবাগৰ পৰা তাল’জা জেইললৈ স্থানান্তৰ কৰাৰ সিদ্ধান্ত গ্ৰহণ কৰা হয়।” তদন্তকাৰী বিষয়া শ্বেইখে কয়।
দেওবাৰে(আজি) পুৱা বিতৰ্কিত সাংবাদিক গৰাকীক আলিবাগৰ পৰা তাল’জা জেইললৈ স্থানান্তৰ কৰাৰ সময়ত তেওঁক আৰক্ষীয়ে অত্যাচাৰ কৰাৰ অভিযোগ উত্থাপন কৰিছে।
লগতে পঢ়ক : ‘মোৰ জীৱনলৈ ভাবুকি আহিছে, অনুগ্ৰহ কৰি আদালতক জনাওক’ : অৰ্ণৱ গোস্বামীৰ বিননি
ইফালে বোম্বে উচ্চ ন্যায়ালয়ে অৰ্ণৱ গোস্বামীৰ জামিন আবেদনৰ শুনানি অহা ৯ নৱেম্বৰলৈকে স্থগিত ৰাখিছে।
