অসম আৰু মিজোৰামৰ মাজত দেখা দিয়া সীমান্ত সমস্যাই প্ৰায় ডেৰ মাহ অতিক্ৰম হোৱাৰ পাছতো বিজেপি নেতৃত্বাধীন অসম চৰকাৰখনে ইয়াক সমাধান কৰিব নোৱাৰাটোৱে অদক্ষতাৰ পৰিচয় দিছে।
অসম, মিজোৰাম আৰু কেন্দ্ৰত বিজেপি বা ইয়াৰ মিত্ৰজোঁটৰ চৰকাৰ থকাৰ পাছতো সমস্যাটো ইমান দিনে সমাধান কৰিব নোৱাৰা কাৰ্যক আম আদমি পাৰ্টীয়ে গৰিহণা দিয়াৰ লগতে বিজেপিয়ে সীমান্ত সমস্যাৰ স্থায়ী সমাধান কৰাত সম্পূৰ্ণৰূপে ব্যৰ্থ হোৱাৰ অভিযোগ উত্থাপন কৰিছে দলটোৱে।
সোমবাৰে গোলাঘাটত এক সংবাদমেল সম্বোধন কৰি দলটোৰ ৰাজ্যিক সমন্বয়ক ডাঃ ভবেন চোধুৰীয়ে কয় যে, মিজোৰামে অসমৰ সীমাত তিনি কিলোমিটাৰ পৰ্যন্ত মাটি দখল কৰি তাত থকা অসমৰ স্কুল পৰ্যন্ত ধ্বংস কৰাৰ পাছতো অসম চৰকাৰ নিৰ্বিকাৰ হৈ থকাটো দুৰ্ভাগ্যজনক।
জাতি-মাটি-ভেটি ৰক্ষাৰ প্ৰতিশ্ৰুতিৰে চৰকাৰ গঠন কৰা মুখ্যমন্ত্ৰী সৰ্বানন্দ সোণোৱাল ডাঙৰীয়াই বিষয়টো গুৰুত্বসহকাৰে লৈ অসমৰ সীমান্ত সুৰক্ষিত কৰাত তৎক্ষাণিক ব্যৱস্থা ল’বলৈ তেওঁ দাবী জনায়।
তেওঁ লগতে কয় যে অসমৰ বান সমস্যা সমাধানৰ বাবে বিজেপিয়ে ব্ৰহ্মপুত্ৰৰ খনন কৰি দুয়োপাৰে এক্সপ্ৰেছ হাইৱে নিৰ্মাণ কৰিব বুলি প্ৰতিশ্ৰুতি দিছিল যদিও এই ক্ষেত্ৰত যোৱা চাৰে-চাৰি বছৰত চৰকাৰে কোনো ব্যৱস্থাই গ্ৰহণ নকৰিলে। ইয়াৰ বিপৰীতে এতিয়া বিজেপি চৰকাৰে মিথ্যাচাৰৰ আশ্ৰয় লোৱাহে পৰিলক্ষিত হৈছে।
ডাঃ চৌধুৰীয়ে কয় যে কেইদিনমানৰ পূৰ্বে কেন্দ্ৰীয় পৰিবহন মন্ত্ৰী নীতিন গাডকাৰীয়ে ঘোষণা কৰিলে যে ইতিমধ্যে চৰকাৰে ব্ৰহ্মপুত্ৰৰ খনন সম্পূৰ্ণ কৰিলে। অকল সিমানেই নহয়, চৰকাৰে হেনো বৰাক নদীও খনন কৰিলে আৰু বাংলাদেশতো আঢ়ৈশ কোটি টকা ব্যয় কৰি ভাৰতে তাতো নদী খনন কৰিলেগৈ। এই জীয়া ফাঁকি স্বয়ং মুখ্যমন্ত্ৰী সোণোৱাল আৰু পৰিবহন মন্ত্ৰী চন্দ্ৰমোহন পাটোৱাৰীৰ সন্মুখতে কৰিলে যদিও তেওঁলোকে অসমৰ জনতাৰ ওচৰত আজি পৰ্যন্ত কোনো স্পষ্টীকৰণ প্ৰকাশ নকৰিলে।
আম আদমি পাৰ্টীয়ে বিজেপিৰ এই মিথ্যাচৰক গৰিহণা দিয়াৰ লগতে অসমৰ জনতাৰ আভুৱা নাভাৰিবলৈ সকীয়াই দিয়ে।
বিজেপিৰ দৰে ফাঁকিবাজ দলেহে এনে জীয়া ফাঁকি দিব পাৰে বুলি ডাঃ চৌধুৰীয়ে কটাক্ষ কৰে।
চৰকাৰে যদি সঁচাকৈ ব্ৰহ্মপুত্ৰৰ খনন কৰিলে তেন্তে খননত ওলোৱা শিল-মাটি ক’ত পেলালে বুলিও আপে প্ৰশ্ন কৰে।
