যোৰহাট জিলাৰ টীয়কৰ এখন ভিতৰুৱা গাঁও l নাম দুইনৈমুখ গাঁও l টীয়ক নৈ আৰু মুদৈজান নৈ এই দুখন নৈৰ মিলনৰ স্থানৰ পাৰতেই অৱস্থিত এই গাওঁখন আৰু সেই বাবেই এই মিলনস্থল বা সংগমস্থলৰ নামেৰেই পৰিচিত এই গাওঁ দুইনৈমুখ ৷
এতিয়া উৎসৱৰ বতৰ, পোহৰৰ উৎসৱ দিপাৱলীলৈ মাজত আৰু এটা দিন। সীমাহীন ব্যৱস্ততা গাঁওবাসীৰ। ঘৰে ঘৰে মাটিৰ চাকি বনোৱাত ব্যস্ত সকলো ৷
অতীতৰে পৰা বিশেষকৈ মৃৎশিল্পৰ লগত জড়িত এইখন গাঁও। অসমৰ থলুৱা এই শিল্পবিধ বহু কষ্টৰে গাঁওৱাসীয়ে ধৰি ৰখাৰ প্ৰয়াস কৰিছে গাঁৱখনৰ প্ৰায় প্ৰতিঘৰ পৰিয়ালে ৷
বহু কষ্টৰে মাটিৰ সামগ্ৰী নিৰ্মাণৰ বাবে ব্যৱহৃত বিশেষ ধৰণৰ আলতিয়া মটি বহু তলৰ পৰা খান্দি উলিয়াই মাটি চাকি, কলহ, দুনৰী আদি বিভিন্ন ৰূপ দিয়ে এই সকল চহা শিল্পীয়ে ৷
মুঠতে প্ৰচুৰ সম্ভাৱনাময় এই খন গাঁৱত এতিয়াও প্ৰায় ২৫-৩০টা পৰিয়াল এই শিল্পৰ লগত জড়িত ৷
গাখীৰৰ বাবে বিখ্যাত টীয়কত এই মৃৎশিল্পৰ বহু চাহিদা আছে সেয়ে এইখন গাঁৱৰ এই সকল শিল্পীৰ সদায় থাকে সীমাহীন ব্যস্ততা।
প্ৰচুৰ চাহিদা থকা এই মৃৎশিল্পক আৰু অধিক সহজসাধ্য কৰি যদি উপযুক্ত চৰকাৰী সা সুবিধা আৰু প্ৰশিক্ষণ দি নতুন চামক আকৰ্ষিত কৰিব পাৰি তেতিয়া অসমৰ গ্ৰাম্য অৰ্থনীতিত টীয়কৰ দুইনৈমুখৰ এই কুমাৰ গাঁৱে যে এক আদৰ্শ দেখুৱাব সেইটো নিশ্চিত।
