নতুন বছৰৰ প্ৰাৰম্ভতে এয়াৰটেলৰ ৰিচাৰ্জ প্লেনৰ মাছুল বৃদ্ধিৰ বিষয়ে জানিব পৰা হোৱা নাই যদিও ৰিলায়েন্স জিঅ’ আৰু ভোডাফোনৰ পাছতে এই সিদ্ধান্ত ল’ব বুলি জানিব পৰা গৈছে।
ৰাষ্ট্ৰীয় সংবাদ মাধ্যমত প্ৰকাশিত প্ৰতিবেদন অনুসৰি জানুৱাৰি নহয়, ডিচেম্বৰতেই ভোডাফোন আইডিয়াই তেওঁলোকৰ মাছুল বৃদ্ধি কৰিব পাৰে।
বৰ্তমান ২৫শতাংশ পৰ্যন্ত মাছুল বৃদ্ধিৰ আলোচনা চলিছে যদিও বহুতেই ইয়াৰ তুলনাত কম বৃদ্ধি পাব বুলি আশা ব্যক্ত কৰিছে।
ইয়াৰ পূৰ্বে ২০১৯ৰ ডিচেম্বৰত শেষবাৰৰ বাবে ৰিলায়েন্স জিঅ’, ভোডাফোন আৰু এয়াৰটেলে মাছুল বৃদ্ধি কৰিছিল।
ইয়াৰ আগেয়ে ভোডাফোন আইডিয়াৰ পৰিচালক সঞ্চালকগৰাকীয়ে এক বিজ্ঞপ্তিযোগে বৰ্তমানৰ মাছুল গ্ৰহণযোগ্য নহয় বুলি উল্লেখ কৰি প্ৰয়োজনত মাছুল বৃদ্ধিৰ ক্ষেত্ৰত তেওঁলোকে সিদ্ধান্ত গ্ৰহণ কৰিব বুলি সদৰী কৰিছিল।
ভোডাফোন আৰু এয়াৰটেলৰ মাছুল বৃদ্ধিৰ আলোচনাৰ মাজতে ৰিলায়েন্স জিঅ’ক লৈ চৰ্চা আৰম্ভ হৈছে।
এতিয়া কথাটো হ’ল এয়াৰটেল-ভোডাফোনৰ দৰে বেচৰকাৰী সংস্থা দুটাৰ পথকে অনুসৰণ কৰি জিঅ’ইয়ো মাছুল বৃদ্ধি কৰিব নেকি?
উল্লেখ্য যে বিগত জুলাইৰ পৰা ছেপ্টেম্বৰ মাহলৈকে এই তিনিমাহত জিঅ’ৰ ৭০ লাখ গ্ৰাহক বৃদ্ধি পাইছে। সেই একেইখিনি সময়ত এয়াৰটেলৰ গ্ৰাহকৰ সংখ্যা বৃদ্ধি পাইছে ১কোটি ৪০লাখ। আনহাতে, এই সময়ছোৱাত ভোডাফোন-আইডিয়াই ৮০লাখ গ্ৰাহক হেৰুৱাইছে।
ইপিনে, বিগত কিছুদিন ধৰি ৰিলায়েন্স জিঅ’ৰ নেটৱৰ্ক সমস্যাইয়ো গ্ৰাহকক জ্বলা-কলা দেখুৱাইছে বুলি চৰ্চা চলিছে।
